काठमाडौँ । स्वीस खाद्य उत्पादक कम्पनी नेस्लेले आफ्नो प्रमुख कार्यकारी अधिकृत (सीईओ) लाई बर्खास्त गरेको छ ।

आफूभन्दा कनिष्ठ कर्मचारीसँगको प्रेम सम्बन्धका कारण कम्पनीले सिइओ लरेन फ्रेक्सीलाई कम्पनीबाट निकालेको हो । सोमबार एक विज्ञप्ति जारी गर्दै कम्पनीले यसबारे जानकारी दिएको हो । कार्यभार सम्हालेको एक वर्षमा लरेन नेस्लेबाट निकालिएका हुन् ।

तत्कालका लागि कम्पनीले नेस्प्रेस्सो कफी एकाईका प्रमुख फिलिप नाभ्रातिललाई सिइओ नियुक्त गरेको छ । उपभोक्ता बजारमा प्रतिस्पर्धा चुलिएको वेला अमेरिकाले लगाएको ट्यारिफका कारण कम्पनीले अनेकौँ कठिनाइ भोगिरहेकै छ ।

कम्पनीका अध्यक्ष पल बुल्के र प्रमुख स्वतन्त्र निर्देशक पाब्लो इस्लाको निगरानीमा भएको छानबिनको क्रममा लरेन कम्पनीमा आफूभन्दा तल्लो पदमा रहेकी कर्मचारीसँग प्रेमिल सम्बन्धमा रहेको खुलासा भएको थियो । उनको यस व्यवहारले कम्पनीको ‘कोड अफ विजनेश कन्डक्ट’को उल्लङ्घन भएको बताइएको छ ।