कासिन न्यूज,
काठमाडौं ।
तीन ठूला दलका शीर्ष नेताहरुको बैठक सोमबार बस्दै। बैठक अपराह्न ४ बजे सिंहदरबारमा बस्ने तय भएको प्रधानमन्त्री कार्यालयले जानकारी दियो ।प्रधानमन्त्री तथा नेकपा एमालेका अध्यक्ष केपी शर्मा ओली, नेपाली कांग्रेसका सभापति शेरबहादुर देउवा र नेकपा माओवादी केन्द्रका अध्यक्ष पुष्पकमल दाहाल ‘प्रचण्ड’ बीच छलफल हुन लागेको हो ।

बैठकमा संक्रमणकालीन न्याय (टीआरसी) बारे छलफल हुने बताइएको छ। यही चैत ६ गतेको प्रतिनिधिसभा बैठकमा माओवादी केन्द्रकी सांसद विमला सुवेदीले टीआरसीको विषयमा सोधेको प्रश्नमा प्रधानमन्त्री केपी ओलीले माओवादी केन्द्रका अध्यक्ष दाहालसँग सम्पर्कको प्रयास भइरहेको जवाफ दिएका थिए।

यो विषयमा दाहाल सँग सम्पर्क गर्न खोजिरहेको तर पटक–पटक प्रयास गर्दा सम्पर्क नभएको बताएका थिए । यसअघि टीआरसीको विषयमा छलफल गर्न चैत ४ गते प्रधानमन्त्री ओलीका विज्ञ सल्लाहकार खरेल खुमलटार पुगेका थिए।तराई–मधेश जागरण अभियानमा रहेका दाहाल छलफलका लागि सोमबार नै काठमाडौँ आउने भएका छन्।