कासिन न्यूज,
काठमाडौं ।
नेपाली कांग्रेसका सांसद डा. चन्द्र भण्डारीको स्वास्थ्यमा क्रमिक रूपमा सुधार आउन थालेको उनको उपचारमा सहभागी चिकित्सकहरुले बताएका छन् ।
गत फागुन ३ गते बुद्धनगरस्थित आफनै निवासमा ग्यास लिक भई आगलागी हुँदा भण्डारी गम्भीर घाइते भएका थिए। उनीसँगै गम्भीर घाइते भएकी उनकी आमा हरिकलाको भने कीर्तिपुर अस्पतालमा उपचारका क्रममा फागुन ४ गते निधन भएको थियो।
सुरूमा भण्डारीको पनि कीर्तिपुरस्थित अस्पतालमा उपचार गरिएकोमा उनलाई थप उपचारका लागि फागुन ४ मा भारतको मुम्बईस्थित नेशनल बर्न सेन्टरमा लगिएको थियो।
सांसद भण्डारीको स्वास्थ्यमा क्रमिक रूपमा सुधार आएको चिकित्सकहरूलाई उद्धृत गर्दै भण्डारीका परिवार निकटले जानकारी दियो ।
भण्डारीको अनुहारको छाला राम्रो हुँदै आएको र बायाँ हातको पट्टी खोलिइसकिएको छ । कलमी गरिएको छालाले पनि राम्रो काम गरिरहेको चिकित्सकहरूले बताएका छन् ।
दिनहुँ सांसद भण्डारीलाई फिजियोथेरापी गराइन्छ भने हिँडाउन पनि सुरू गरिएको छ। दिनमा तीन÷चार पटक हिँडाउन थालिएको छ ।