कासिन न्यूज,
काठमाडौं ।
पूर्वप्रधानमन्त्री तथा नेकपा एमालेका अध्यक्ष केपी शर्मा ओलीको स्वागत गर्ने क्रममा सोमबार नेपालगन्ज विमानस्थलमा कार्यकर्ताको ठूलो भिड बुद्ध एयरको ढोकैमा पुगेको छ । हवाई सुरक्षाको गम्भीर उल्लंघन भएको पाइएको छ ।
नेपालगन्ज विमानस्थलका प्रमुख सुरेश खनालका अनुसार यो सोमबार बिहानको उडान थियो । जुन विमानले एमाले अध्यक्ष ओलीलाई लिएर नेपालगञ्ज आइपुगेको थियो । बीएचए ४५१ जहाज बिहान ९ः३० बजे नेपालगञ्ज विमानस्थलमा अवतरण गरेको थियो ।
नेपालगन्ज सुरक्षाको जिम्मा नेपाल प्रहरीको हो । विमानस्थल भित्र सर्वसाधारण र यात्रुलाई समेत विना बोर्डिङ पास जहाजको नजिकै जान दिइँदैन ।
तर, सोमबार ओलीको स्वागतमा भने जहाजको ढोकामै कार्यकर्ताको ठूलो भिड लागेको देखिएको छ । ‘यो नहुनु पर्ने थियो,’ विमानस्थल प्रमुख खनाल भन्छन्, यसलाई व्यवस्थित गर्ने जिम्मा नेपाल प्रहरीको हो ।’