कासिन न्यूज,
काठमाडौं ।
नवनियुक्त परराष्ट्रमन्त्री एनपी साउदले प्रधानमन्त्री पुष्पकमल दाहाल प्रचण्डको भारत भ्रमणको तयारीमा तिब्रता दिने बताएका छन् ।
आइतबार सिंहदरबारस्थित कार्यालयमा पुगेर पदभार ग्रहण गरेलगत्तै उनले सो कामलाई अघि बढाइहाल्ने बताएका हुन् । प्रधानमन्त्री दाहालको भारत भ्रमणबारे सञ्चारकर्मीहरूले राखेका जिज्ञासाको जवाफ दिने क्रममा मन्त्री साउदले मन्त्रालयका सचिवलगायत त्यसको तयारीमा रहेका टिमहरूसँग ब्रिफिङ लिएर सो कामलाई अघि बढाउने उल्लेख गरे ।
मन्त्री साउदले आफूले नेपाललाई विश्वभर नै शान्तिप्रिय र लोकतान्त्रिक देशका रूपमा चिनाउन पहल गर्ने प्रतिबद्धता समेत व्यक्त गरे ।

छिमेकीसहितका देशहरूसँगको नेपालको सम्बन्ध सौहार्दपूर्ण, शान्तिपूर्ण र सुमधुर सम्बन्ध रही आएको उल्लेख गर्दै त्यसलाई अझै घनिष्ट बनाउँदै लैजाने पनि बताए ।
सो अवसरमा मन्त्रालयका सचिव भरतराज पौड्यालसहित उच्च पदस्थ कर्मचारीहरूले मन्त्री साउदको स्वागत गरेका थिए ।