कासिन न्यूज,
मकवानपुर ।
राष्ट्रिय स्वतन्त्र पार्टी (रास्वपा)का सभापति रवि लामिछानेका सवारी चालक दिलबहादुर थापा (शम्भु) घरको ३ तला माथीबाट खसेका छन् । राती बास बसेको चितवनको भरतपुरस्थित एक घरको तीन तला माथिबाट तल खसेका ३९ वर्षीय शम्भुको स्वस्थ्य अवस्था गम्भीर रहेको प्रहरीले जनाएको छ ।
सिन्धुपाल्चोकको बाह्रबिसे नगरपालिका–३ घर भएका शम्भु बिहान ४ बजे भाडामा लिएको घरको छतबाट तल भुइँमा खसेको अवस्थामा भेटिएको चितवन प्रहरीले जनाएको छ । प्रहरीका अनुसार गम्भीर घाइते थापाको टाउको र खुट्टामा चोट लागेको उनको भरतपुरस्थित कलेज अफ मेडिकल साइन्सेसमा उपचार भैरहेको छ ।
उनी रास्वपाका महामन्त्री मुकुल ढकालका सवारी चालक कालुराम राजवंशीसँगै राति छतमा सुतेका थिए । रास्वपाले सोमबार बिहान भरतपुरका विभिन्न स्थानमा घरदैलो गर्ने कार्यक्रम गर्ने पूर्व तालिका थियो । घटनाबारे थप अनुसन्धान भइरहेको प्रहरीले जनाएको छ ।