कासिन न्यूज,
काठमाडौं ।
इटालियन सिरी ‘ए’ मा युभेन्ट्स पराजित भएको छ । युभेन्ट्स घरेलु टोल सस्सुलोसँग १–० ले पराजित भएको हो ।
सस्सुलोको जितमा दोस्रो हाफमा ग्रेगोइरे डेफ्रेलले गरेको गोल नै निर्णायक बन्यो । दोस्रो हाफमा एन्ड्रिया पिनामोन्टीको स्थानमा मैदान छिरेका उनले ६४औं मिनेटमा गोल गर्न सफल भएका थिए ।
मापेई स्टेडियमा आइतबार राति भएको खेलमा युभेन्ट्सले घरेलु टोलीमाथि दवाव कायम राखेपनि गोल गर्न नसक्दा पराजित हुन पुग्यो । यस हारसँगै युभेन्ट्सलाई अर्काे सिजनको लागि युरोपेली क्लब फुटबलमा स्थान बनाउन थप मिहेनत गर्नुपर्ने देखिएको छ ।
जनवरीमा अवैध स्थानान्तरण गतिविधि गरेको आरोपका १५ अंक घटाइएपछि युभेन्ट्स सिरी ‘ए’ मा शीर्ष ६ भन्दा बाहिर छ ।
युभेन्ट्स ३० खेलबाट ४४ अंक जोडेर सातौं स्थानमा छ । युभेन्ट्स शीर्ष ६ को एटलान्टाभन्दा ४ अंकले पछि छ । सस्सुलो ४० अंक जोडेर १०औं स्थानमा छ ।
सिरी ‘ए’ कै अर्काे खेलमा रोमाले उडिनेसलाई ३–० ले पराजित गरेको छ । रोमाको जितमा इडोआर्डो बोभ, लोरेन्जो पेलेग्रिनी र ट्याम्मी अब्राहमले गोल गरे । रोमाका ब्रायन त्रिस्टान्टे र उडिनेसका रोबर्टाे पेरेराले पेनाल्टी चुकाएका थिए ।
यस जितसँगै रोमा ३० खेलबाट ५६ अंक जोडेर तेस्रो स्थानमा उक्लिएको छ । पराजित उडिनेस ३९ अंक जोडेर १२औं स्थानमा छ ।