कासिन न्यूज,
काठमाडौं ।
बैशाख ३ गते परराष्ट्र मन्त्रीको शपथ लिएकै दिन मन्त्री एनपी साउदले प्रधानमन्त्रीको भारत भ्रमणको तयारी प्रक्रिया थाल्ने बताए सँगै तयारी पनि सुरु भएको छ ।
कर्मचारीसँग ब्रिफिङ लिएर भ्रमणको तयारी अगाडि बढाइरहेको मन्त्री साउद सचिवालयले जानकारी दियो । परराष्ट्र मन्त्रालयका अनुसार भ्रमणको एजेन्डाबारे दुवै देशका अधिकारीले छलफल गरिरहेका छन् ।
मन्त्री साउदले अझै पनि प्रधानमन्त्रीको भारत भ्रमणको विषयमा आन्तरिक तयारी चलिरहेको आइतबार बताए । ‘भ्रमणको क्रममा छलफल हुने एजेन्डाको विषयमा सम्बन्धित मन्त्रालयसँग छलफल भइरहेको छ, केही दिनमा सबै विषय टुङ्गो लाग्छ । त्यसपछि मिति तय हुन्छ’, उनको भनाइ छ

यसअघि नै भारतले मे १० देखि १९ तारेखको बीचमा जुनसुकै दिन भारतको भ्रमण गर्न सकिने निमन्त्रणा पठाएको छ । नेपालले पनि प्रचण्डले वैशाख ३१ र जेठ १ गते (मे १४–१५)मध्ये एउटा कुनै दिन भ्रमणमा आउन सकिने कार्य तालिकाको प्रस्ताव दिल्ली पठाएको थियो ।
उपचुनावपछि नेपालको राजनीति परिस्थिति फेरिएको छ । राष्ट्रिय स्वतन्त्र पार्टीले सरकारबाट समर्थन फिर्ता लिएमा पुनः विश्वासको मत लिनुपर्ने अवस्था आउन सक्ने भय प्रचण्डमा छ । यस्तो पृष्ठभूमिमा प्रधानमन्त्रीको भारत भ्रमणको मिति तय गर्न ढिलाइ हुने अवस्था आएको बताइएको छ । ‘मिति तय गर्नका लागि तयारी पनि पुगेको छैन’, परराष्ट्र मन्त्रालयका एक अधिकारीले भने, ‘दुवै देशका अधिकारीले साझा एजेन्डामा छलफल गरिरहेका छन्, एजेन्डा तय भएपछि मात्र मिति घोषणा हुन्छ ।’