कासिन न्यूज,
काठमाडौं ।
नेकपा एमालेका सचिव टोपबहादुर रायमाझीविरुद्ध पक्राउ पुर्जी जारी भएपछि अध्यक्ष केपी शर्मा ओलीले प्रधानमन्त्री पुष्पकमल दाहाल प्रचण्डसँग दुई पटक भेट गरिसकेका छन् । ओलीको प्रधानमन्त्री दाहाल सँग भेटको मुख्य प्रसंग भनेको एमाले नेता रायमाझी हुन् । केही दिन देखी एमाले अध्यक्ष ओली र प्रधानमन्त्री दाहालको भेटघाट क्रम बढ्दो छ ।

बिहीबार भेटेर यसै विषयमा छलफल गरेका ओलीले शनिबार पनि प्रधानमन्त्रीसँग भेट गरेका हुन् । बुधबार रायमाझीविरुद्ध पक्राउ पुर्जी जारी भएपछि बिहीबार ओलीले प्रचण्डसँग भेट गरेका थिए । भेटपछि पत्रकारहरुसँग कुरा गर्दै ओलीले रायमाझी बाटोबाटै पक्राउ गर्नुपर्ने व्यक्ति नभएको भन्दै सरकारले षड्यन्त्र गरिरहेको आरोप लगाएका थिए ।

शनिबार प्रधानमन्त्रीसँगको भेटपछि पत्रकारहरुले रायमाझी कहाँ छन् भनेर ओलीसँग जिज्ञासा राखेका थिए । ओलीले भने कहाँ छन् भन्ने आफूलाई जानकारी नभएको भन्दै पत्रकारहरुलाई जवाफ दिए, ‘तपाईहरु खोज्नुस् न ?’