कासिन न्यूज,
काठमाडौं ।

संयुक्त राष्ट्रसङ्घका महासचिव एन्टोनियो गुटेर्रेसले सुडानमा जारी हिंसा तत्काल अन्त्य गर्न आह्वान गरेका छन् ।

महासचिव गुटेर्रेसले बुरुन्डीको आर्थिक केन्द्र बुजुम्बुरामा शुक्रबार बुरुन्डीका राष्ट्रपति इभारिस्टे नदायिशिमिएसँग भेटवार्ता गरेपछि सुडानमा जारी हिंसा तत्काल अन्त्य गर्न आह्वान गरेका हुन ।

प्रजातान्त्रिक गणतन्त्र कङ्गो र यस क्षेत्रमा शान्ति, सुरक्षा र सहयोगका लागि ‘अदिस अबाबा फ्रेमवर्क’ सम्झौतासम्बन्धी क्षेत्रीय पर्यवेक्षण संयन्त्रका राष्ट्रप्रमुखहरूको ११औँ शिखर सम्मेलनका क्रममा गुटेर्रेसले बुरुन्डीका राष्ट्रपतिलाई भेटेका हुन ।

गुटेर्रेसले भने, “हामी सुडानमा अहिले भइरहेको शत्रुता तत्काल अन्त्य गर्न आग्रह गर्दछौं । उनले सुडानी सङ्कट समाधानका लागि क्षेत्रीय व्यापार समूह ‘इन्टरगभर्नमेन्टल अथोरिटी अन डेभलपमेन्ट (आईजीएडी)’ ले गरेको मध्यस्थता प्रयासको प्रशंसा गरे । गुटेर्रेसले पूर्वी प्रजातान्त्रिक गणतन्त्र कङ्गो (डीआरसी)को अवस्था पनि चिन्ताजनक रहेको भन्दै समाधानका लागि विश्व समुदाय आ–आफ्नो स्थानबाट लाग्नुपर्ने बताए ।

उनले पूर्वी डीआरसी र अन्य शान्ति मिसनमा शान्ति बहालीमा बुरुन्डीले गरेको योगदान र प्रशासनमा गरेको प्रयासको प्रशंसा गरे ।

“मेलमिलाप, लोकतान्त्रिक शासन र आर्थिक विकासका सम्बन्धमा बुरुन्डीले हासिल गरेको उल्लेखनीय प्रगतिको प्रशंसा गर्ने अवसर मैले पाएको छु,” बुरुन्डीका राष्ट्रपति इभारिस्टे नदायिशिमियेसँगको भेटपछि गुटेरेसले जारी गरेको विज्ञप्तिमा भनिएको छ ।

उनले बुरुन्डीलाई धेरै र पूर्ण रूपमा हकदार रहेको अन्तर्राष्ट्रिय समुदायको अझ बलियो समर्थन जुटाउन सक्दो प्रयास गर्न संयुक्त राष्ट्रसङ्घको ‘बलियो समर्थन र प्रतिबद्धता’ को आश्वासन बुरुन्डीको राष्ट्रपतिलाई दिएको बताए ।

उनका अनुसार पूर्वी डीआरसीमा पूर्वी अफ्रिकी सेनाको तैनाथीको सन्दर्भमा डीआरसीमा बुरुन्डी सैनिकहरूको उपस्थितिले मेलमिलाप र शान्तिको लागि ‘व्यापक कार्यकुशलता र धेरै सकारात्मक योगदान’ देखाएको छ, र आज ‘बुरुन्डी क्षेत्रीय सहयोगको लागि एक स्तम्भ’ हो ।