कासिन न्यूज,
काठमाडौं ।

चारवर्ष अगाडि अभिनेता विजय बरालसँग विवाह बन्धनमा बधिएकी अभिनेत्री प्रमिला खनालले आमा बनेपछि त्यो पात्रको गहिराईलाई बुझेको बताएकील छन् । आफू अभिनित प्रदर्शनको तयारीमा रहेको चलचित्र ‘हुक्काः एन एब्जर्ड ड्रिम’ बारे जानकारी दिन आईतबार आयोजित कार्यक्रममा उनले मातृत्वलाई पर्दामा ल्याए पनि बुझाई बल्ल आएको जानकारी दिइन् ।

वैशाखको पहिलो हप्ता आमा बनेकी अभिनेत्री खनालले चलचित्रको पात्रलाई अझै नजिकबाट महसुस गरेको बताइन । “हामीले पर्दामा गरिरहेको अभिनयमा चाहिने ममता, धैर्यता र सङ्घर्षलाई महसुस गरे । सम्बन्ध विच्छेदपछि माइतमै बसेकी एक छोरीकी आमा र गाउँकी मुखियाकी छोरीको चरित्रमा देखिएकी छु”, अभिनेत्री खनालले भनीन् ।

चलचित्र ‘दबाब’ बाट अभिनय यात्रा सुरु गरेकी अभिनेत्री खनालले सहायक चरित्रबाट मुख्य चरित्रमा आफूलाई प्रस्तुत गर्न गरेको सङ्घर्षलाई सम्झिन् । अभिनेत्रीको फेरिएको परिभाषाले उनलाई अगाडि आउन मद्दत गरेको छ । “पहिला अभिनेत्री भन्ने वितिकै मानसपटलमा आउने चित्र अहिले फेरिएको छ । अहिले नामभन्दा पनि चरित्रलाई दर्शकले बुझ्न थाल्नुभएको छ । परिभाषा फेरिएसँगै धेरैले काम पाइरहेकी छन् ”, अभिनेत्री खनालले भनिन् ।

गाउँमा रहँदा एउटा सामान्य कोइला बालेर तमाखु भरी धुँवा तान्ने भाडालाई ‘हुक्का’ सम्झिने अभिनेत्री खनालले वास्तविकता यो चलचित्रमा काम गरेपछि बुझिन । उनले यसमा साहसी र निडर महिलाको भूमिका निर्वाह गरेकी छन् । शम्भु थापाको निर्देशन तयार भएको चलचित्रमा सन्तोषकुमार आत्रेय, प्रकाश घिमिरे, तेज गिरी, अशु न्यौपाने, तलिशा गुरुङ, निश्चल विमल, एलिशा विकले अभिनय गरेका छन् ।