कासिन न्यूज,
काठमाडौं ।

जिल्ला अदालत काठमाडौँबाट ३ दिनको म्याद थप भएसँगै सरकारी वकिलको कार्यालयमा पूर्वउपप्रधानमन्त्री टोपबहादुर रायमाझीको बयान गराइएको छ। नक्कली भुटानी शरणार्थी प्ररकणमा पक्राउ परेका रायमाझीलाई यो प्रकरणमा सम्बन्धित रहेर बयान गराइएको हो ।

आइतबार साँझा काठमाडौंको बुढानिलकण्ठबाट पक्राउ परेका रायमाझीले सोमबार जिल्ला अदालत काठमाडौंमा न्यायधीशसँग घरको खानाको माग गरेका हुन् ।

पक्राउ पूर्जी जारी भएपछि बैशाख २० गते फरार भएका पूर्वउपप्रधानमन्त्री रायमाझीलाई अनुसन्धानका लागि म्याद थप गर्न सोमबार प्रहरीले अदालत लगेको थियो । तर, अदालतसम्म पुग्दा उनी निकै प्रफुल्लित मुद्रामा देखिन्थे । सोही क्रममा उनले न्यायधीशसँग घरको खानाको माग गरेका हुन् ।

सरकारी वकिलहरुकै अघि टोपबहादुर रायमाझीले आफू प्रोस्टेटको बिरामी भएकोले आफूलाई सिधै हिरासतमा नराख्न आग्रह गरे । यतिमात्र होइन उनले आफूले बाहिरको खाना खान नमिल्ने र आफूलाई घरकै सादा खानाको व्यवस्था गरिदिन भने । जवाफमा न्यायधीशले भने– ‘त्यो त प्रहरीले नै मिलाउने कुरा हो ।’

रायमाझी भुटानी शरणार्थी प्रकरणमै पक्राउ परेका पूर्वगृहमन्त्री बालकृष्ण खाँणभन्दा फरक रूपमा देखिए । खाँण पक्राउ परेदेखि नै निलो रङको क्याप र मास्क लगाएर सार्वजनिक भएका थिए । उनले सरकारी वकिलको कार्यालय जाँदा होस् वा अदालत जाँदा, मास्क र टोपी खोलेका छैनन् ।

तर, रायमाझीले मास्क लगाएनन् । बरु मज्जाले मुस्कान दिएर अदालत परिसरमै हात हल्लाएर पोज दिन भ्याए । उसो त रायमाझीलाई उनका कानून व्यवसायीहरूमध्येका एकजनाले नै उनलाई मास्क नलगाएर प्रस्तुत हुन सुझाएका थिए ।

“चोरी गरेको भए पो मुख लुकाउनु, निर्दोषले शिर ठडाएर हिँड्ने हो,” उनका कानून व्यवसायीले रायमाझीलाई भनेका थिए ।

रायमाझी सोमबार दिउँसो करिब ३ बजे जिल्ला अदालतको इजलासभित्र प्रवेश गरे । उनीभन्दा अगाडि १०–१२ जना थुनुवा थिए । उनीहरूको काम सकिएपछि मात्र रायमाझीको पालो आयो ।

आत्मविश्वासका साथ प्रवेश भएका रायमाझी पालो कुरिरहँदा भने आत्तिएका देखिन्थे । उनीभन्दा अगाडि लागुऔषध, चोरी तथा साइबर क्राइमुका थुनुवाहरू थिए । उनीहरूलाई इजलास–५ मा रहेका न्यायाधीशले एक–एक गर्दै प्रश्न गरिरहेका थिए ।

पालो कुर्दै बसेका रायमाझीले आफ्ना कानुन व्यवसायीसँग इजलासमा कसरी प्रस्तुत हुने भनेर सल्लाह गरे । उनले कानुन व्यवसायीसँग सोधेका थिए– इजलासमा रहेका न्यायाधीशलाई श्रीमान् नै भनेर सम्बोधन गर्ने हो ?

उनी धैर्य भएर आफूभन्दा अगाडिका थुनुवाहरूलाई न्यायाधीशले गरेका प्रश्न र थुनुवाहरूको जवाफ सुनिरहेका थिए ।

इजलासमा रहेका न्यायाधीशले हरेक थुनुवालाई उनको पेसाका बारेमा सोधिरहेका थिए । थुनुवाले आफ्नो पेसा भनेपछि उनले उक्त पेसाको मानिस कसरी यहाँ आइपुग्नु भयो त भन्दै सोध्ने गरेका थिए । न्यायाधीशले एक थुनुवाको एक हातमा हत्कडी देखेपछि प्रहरीलाई गालीसमेत गरे ।

इजलासमा प्रवेश गरेपछि सबै व्यक्ति स्वतन्त्र छन्, न्यायाधीशले भनेका थिए । न्यायाधीशले आगामी दिनमा इजलासमा कसैलाई पनि हत्कडी नलगाएर ल्याउन आदेश दिएका थिए ।

अदालतले रायमाझीलाई ३ दिन हिरासतमा राखेर अनुसन्धान गर्न अनुमति दिएको छ ।