कासिन न्यूज,
काठमाडौं ।
नेपालीलाई नक्कली भुटानी शरणार्थी बनाइ अमेरिका पठाइदिने भन्दै पैसा उठाएर भएको ठगी प्रकरणमा लागेकाहरुको आइतबार देखि काठमाडौं जिल्ला अदालतमा थुनछेक बहस सुरु हुने भएको छ ।
हालसम्म पक्राउ परेका १८ जना अभियुक्तको अदालती बयान सकिएपछि आइतबारदेखि थुनछेक बहस हुने भएको हो।
यही प्रकरणका मुख्य आरोपी मानिएका नेपाली कांग्रेसका नेता एवं पूर्वगृहमन्त्री बालकृण खाणका पक्षबाट २ जना पूर्वमहान्यायाधिवक्ता सहित दर्जन बढी कानुन व्यवसायीले बहस गर्ने भएका छन्।
पूर्वगृहमन्त्री खाणका तर्फबाट पूर्वमहान्यायाधिवक्ता खम्मबहादुर खाती र महादेव यादवले बहस गर्दैछन् । त्यस्तै, नेपाल बार एसोसिएसनका वर्तमान र पूर्वअध्यक्षहरूले पनि खाणको पक्षमा बहस गर्दैछन्। बारका वर्तमान अध्यक्ष गोपालकृष्ण घिमिरे, पूर्वअध्यक्ष शेरबहादुर केसी र प्रेमबहादुर खड्काले खाणको पक्षबाट बहस गर्ने पूर्वमहान्यायाधिवक्ता खातीले जानकारी दिए।

त्यसबाहेक योगेन्द्र अधिकारीसहित १८ जनाभन्दा बढी अधिवक्ताले खाणको पक्षबाट बहस गर्न नाम टिपाएको छन् । अघिकारी डेमोक्र्याटिक लयर्स एसोसिएसनका वर्तमान अध्यक्ष हुन्।
बहस गर्न चाहने अधिवक्ताको संख्या धेरै भए पनि काँटछाँट गरिने छ । खाणको पक्षबाट बहस गर्न चाहने अधिवक्ता धेरैको संख्या धेरै छ। जानकारीमा आएअनुसार १८ जनाभन्दा धेरै अधिवक्ता छन्।