कासिन न्यूज,
काठमाडौं ।
हार सँगै जित बराबरको उपाधि नेपाली महिला क्रिकेटले पाएको छ । महिला क्रिकेट टोलीकी कप्तान रुविना क्षेत्री बेलबासेले मलेसियासँगको पाँच टि२० आई खेलको सिरिजमा सर्वोत्कृष्ट खेलाडीको उपाधि चुमे सँगै नेपाली महिला क्रिकेटमा केही खुशी छाएको छ ।

नेपाललाई सिरिज ३–२ ले जिताउन अलराउन्ड प्रदर्शन गरेकी रुविना प्लेयर अफ द सिरिज(सर्वोत्कृष्ट) खेलाडी चुनिएकी हुन् । नेपालले पाँचौं तथा अन्तिम खेलमा मलेसियालाई तीन विकेटले पराजित गर्दै सिरिज जितेको थियो । रुविनाले पाँच खेलको सिरिजमा ८१ रन बनाउनुको साथै ५ विकेट लिएकी थिइन् ।
नेपाल पहिलो खेलमा मलेसियासँग ५ विकेटले पराजित हुन पुग्यो । नेपाल ५० रनमै अल आउट भएको थियो । उक्त खेलमा रुविनाले ४ ओभरमा ७ रन खर्चेर २ विकेट लिएकी थिइन् । महिला टि२० आईमा नेपालको मलेसियासँग पहिलो हार थियो ।
दोस्रो खेलमा नेपाल ७ विकेटले विजयी भएको थियो ।

जितको लागि ९८ रनको लक्ष्य नेपालले १७.३ ओभरमा ३ विकेट गुमाउँदै पूरा गर्दा रुविनाले २१ बलमा ३ चौका र १ छक्कासहित २९ रनमा अविजित इनिङ खेलेकी थिइन् । बलिङतर्फ रुविनाले ४ ओभरमा १६ रन खर्चेर २ विकेट लिएकी थिइन् । तेस्रो खेलमा नेपाल २७ रनले विजयी भएको थियो ।

उक्त खेलमा रुविनाले १५ बलमा ३ चौका र १ छक्कासहित २७ रन बनाएकी थिइन् । चौथो खेलमा भने रुविना डक आउट भएकी थिइन् । उक्त खेलमा नेपाल ४ विकेटले पराजित भएको थियो । रुविनाले ४ ओभरमा १३ रन खर्चेर १ विकेट लिएकी थिइन् । अन्तिम खेलमा मलेसियालाई तीन विकेटले हराउन रुविनाले ३० बलमा ३ चौकासहित महत्वपूर्ण २३ रन जोडेकी थिइन् ।