कासिन न्यूज,
विराटनगर ।
नेकपा माओवादी केन्द्रबाट कोशी प्रदेश सरकारमा रहेका भौतिक पूर्वाधार मन्त्री दुर्गा चापागाईं र पर्यटन वन तथा वातावरण मन्त्री जीवन आचार्यले मुख्यमन्त्री हिक्मत कार्कीलाई राजीनामा बुझाएका हुन् ।
माओवादीको कोशी प्रदेश संसदीय दलले एमाले नेता हिक्मतकुमार कार्की नेतृत्वको सरकारलाई दिएको समर्थन फिर्ता लिने निर्णय पहिले नै गरिसकेको थियो ।
समर्थन फिर्ता लिएपछि प्रदेशमा नयाँ सरकार गठनको गृहकार्य सुरु भएको छ । सत्तारुढ दल नेकपा माओवादी केन्द्र र नेपाली कांग्रेसले आफ्नो नेतृत्वमा सरकार गठनका लागि गृहकार्य सुरु गरेका हुन् । माओवादीले समर्थन फिर्ता लिएपछि एक मतका कारण अल्पमतमा परेका मुख्यमन्त्री हिक्मतकुमार कार्की पनि आफ्नो सरकार जोगाउने तयारीमा छन् ।

मुख्यमन्त्री कार्कीलाई विश्वासको मत लिनका लागि ३० दिनको समय छ । उनले विश्वासको मत पाए मुख्यमन्त्रीमा निरन्तरता पाउनेछन्, नपाए नयाँ सरकार गठनको बाटो खुल्नेछ ।
कांग्रेस–माओवादी केन्द्र, नेकपा एकीकृत समाजवादी र जसपासहितको गठबन्धनलाई पनि गृहकार्यका लागि ३० दिनको समय छ ।
उता मंगलबारबाटै माओवादी केन्द्र संसदीय दलका नेता इन्द्रबहादुर आङ्बो र कांग्रेस संसदीय दलका नेता उद्धव थापाले आ–आफ्नो नेतृत्वमा सरकार गठनका लागि पहल गर्ने निर्णय संसदीय दलको बैठकबाट गराएर छलफल थालेका छन् ।
प्रदेश तहमा दलले नेतृत्वमा दाबी गरे पनि सत्ता गठबन्धनको केन्द्रीय नेतृत्वले भने हालसम्म कुनै निर्णय गरेको छैन ।
९३ सदस्यीय प्रदेशसभामा बहुमतका लागि ४७ सांसदको समर्थन आवश्यक पर्छ । सरकारमा रहेका दुई दल नेकपा एमालेसँग ४० र राप्रपासँग ६ गरी ४६ सांसद छन् ।

प्रतिपक्षमा रहेको नेपाली कांग्रेसका २९, नेकपा माओवादी केन्द्रका १२, एकीकृत समाजवादीका ४ र जनता समाजवादी पार्टीका १ गरी ४६ नै सांसद छन् । सरकार गठनका लागि निर्णायक देखिएको राप्रपालाई एमालेबाट छुटाएर आफ्नो पक्षमा ल्याउन सत्ता गठबन्धनले प्रयास गरिरहेका छन् ।

राप्रपाले भने एमालेको साथ छाड्दा आफूले मुख्यमन्त्री पाउनुपर्ने सर्त राखेको छ । तर कांग्रेस र माओवादी केन्द्र राप्रपालाई मुख्यमन्त्रीमा स्वीकार गर्ने पक्षमा अहिलेसम्म देखिएका छैनन् ।