कासिन न्यूज,
काठमाडौं ।
लागू औषध कारोबारीलाई पक्राउ गर्न प्रहरीले त्रिभुवन विमानस्थल नजिक बुद्ध कार्गोको कार्यालय छेउमा गोली चलाएको छ । नेपाल प्रहरीको लागू औषध नियन्त्रण ब्यूरोबाट खटिएको टोलीले गोली चलाएको हो।
घुँडाभन्दा मुनि गोली प्रहार गरी लागू औषध कारोबारी पक्राउ गरिएको ब्यूरोले जानकारी दियो ।

लागूऔषध नियन्त्रण ब्यूरोको टोलीले ओसार पसारमा संलग्नको आशंकामा पक्राउ गर्ने क्रममा विकास भगतमाथि गोली चलाएको हो ।प्रहरीले गोली लागेर घाइते भएका उनलाई उपचारका लागि काठमाडौं मेडिकल कलेज पठाइएको लागू औषध नियन्त्रण ब्यूरोका प्रमुख गोविन्द थपलियाले जानकारी दिए ।

भगतबाट प्रहरीले १०० ग्राम लागू औषध नियन्त्रणमा लिएको छ । ठूलो मात्रामा लागूऔषध ओसारपसार गरेको आशंकामा ब्यूरोबाट प्रहरी निरीक्षकको टोलीले भगतलाई पछ्याएको थियो ।

भगत एक घरभित्र प्रवेश गरेपछि प्रहरी पनि पुगेको थियो । ब्यूरोका प्रमुख थपलियाका अनुसार भगतले प्रहरी टोलीमाथि आक्रमण गरेपछि गोली चलाइएको हो ।