कासिन न्यूज,
काठमाडौं ।
नेपाल सहभागी हुने एसिया कप पाकिस्तान र श्रीलंकामा हुने पक्का भएको छ । एसियन क्रिकेट काउन्सिल (एसिसी) ले बिहीबार एकदिवसीय एसिया कप २०२३ आगमी अगष्ट ३१ देखी १७ सेप्टेम्बरसम्म पाकिस्तान र श्रीलंकामा हुने पक्का भएको जनाएको छ ।
प्रतियोगिताका चार खेल पाकिस्तान र बाँकी ९ खेल श्रीलंकामा हुने एसिसीले जनाएको छ । भारत पाकिस्तान जाने नभएपछि श्रीलंकामा ९ खेल हुने भएका छन् । नेपालले भने पाकिस्तानसँगको खेल पाकिस्तानमै खेल्नेछ । समूह ए मा नेपाल, भारत र पाकिस्तान छन् । समूह बी श्रीलंका, बंगलादेश र अफगानिस्तान छन् ।
नेपालले अघिल्लो महिना घरेलु मैदान टियुमा एसिसी प्रिमियर कपको फाइनलमा युएईलाई हराउँदै एसिया कपमा स्थान बनाएको थियो । आफ्नो क्रिकेट इतिहासमा नेपालले पहिलो पटक भारत र पाकिस्तानसँग खेल्न पाउनेछ । भारत र पाकिस्तानबीचको आन्तरिक राजनीतक विवादको कारण एसिया कप अन्यौलमा परेको थियो ।
तर पाकिस्तान र श्रीलंकामा हुने सहमती भएकोछ । आयोजक पाकिस्कतानमा भने मात्रै चार खेल हुनेछन् । हरेक समूहबाट शीर्ष दुई टोली सुपर फोरमा पुग्नेछन् । सुपर फोरमा एक अर्कासँग खेलेपछि शीर्ष दुई टोली फाइनलमा पुग्नेछन् ।