कासिन न्यूज,
काठमाडौं ।
प्रहरी अधिकारीको गोली लागेर एक किशोरको मृत्यु भएपछि फ्रान्सेली सहर मार्सेमा जारी विरोध प्रदर्शनले पाँचौँ रात कटाएको छ । प्रहरी र दंगाकारीहरूबीच झडप जारी छ ।
सार्वजनिक भएका भिडिओहरूमा प्रहरीले दंगा नियन्त्रणका लागि अश्रु ग्यासको प्रयोग गरेको देखिन्छ। अधिकारीहरूका अनुसार यस दक्षिणी सहरबाट मात्रै थप ५६ जना पक्राउ परेका छन्। मध्य प्यारिसमा भने उल्लेखनीय संख्यामा प्रहरी तैनाथ भएकाले विरोध प्रदर्शन केही निरुत्साहित भएको छ ।

प्यारिस नजिकैको उपनगर नान्तेरमा भएको हत्यापछि फ्रान्सका धेरै सहरहरूमा मङ्गलवारदेखि अशान्ति फैलिएको हो।शनिवार पुनः देशभर करिब ४५ हजार प्रहरी परिचालन गरिएको छ। त्यहाँको आन्तरिक मामिला मन्त्रालयका अनुसार स्थानीय समयअनुसार आइतवार बिहानको साढे तीन बजेसम्ममा ४८६ जनालाई पक्राउ गरिएको छ।

शुक्रवार रातिसम्म १३ सय जनालाई पक्राउ गरिएको थियो भने विहीवार ९सय जना पक्राउ परेका थिए। शनिवार साँझभर मार्से सहरमा सुरक्षा बल र प्रदर्शनकारीहरू बीच घम्साघम्सी निरन्तर चल्यो।