कासिन न्यूज,
काठमाडौं ।

भारतको जम्मु कश्मीरमा पवित्र तीर्थस्थल अमरनाथ यात्रा सुरु भएको छ ।

जम्मु कश्मीर प्रशासनले शनिबार बालटाल आधार शिविरबाट तीर्थयात्रीहरूको पहिलो समूहलाई बिदाई गरेसँगै औपचारिक रुपमा यात्रा सुरु भएको हो ।

जम्मु कश्मीरको अनन्तनाग क्षेत्रमा रहेको यस गुफामा भगवान् शिवको मन्दिर रहेको छ । १२ किलोमिटर दूरीको यस अमरनाथ यात्रालाई हिन्दू धर्ममा निकै महत्वपूर्ण मानिन्छ । १३ हजार फिटको उचाईमा अमरनाथ गुफामा रहेको मन्दिरसम्मको यात्रालाई निकै कष्टपूर्ण हुने बताइन्छ ।

यस तीर्थयात्रामा सहभागी भएमा दुःख, कष्ट र पापबाट छुटकारा मिल्ने जनविश्वास रहीआएको छ । ६२ दिने तीर्थयात्रालाई मध्यनजर गर्दै सुरक्षा व्यवस्था उच्च पारिएको जम्मु कश्मीरका अधिकारीले जनाएका छन् ।