कासिन न्यूज,
काठमाडौं ।

अन्तर्राष्ट्रिय क्षेत्रमा हिन्दी भाषालाई प्रचलनमा ल्याउनका लागि भारतले संयुक्त राष्ट्रसंघलाई १० लाख डलर प्रदान गरेको छ ।

संयुक्त राष्ट्रसंघमा भारतीय स्थायी प्रतिनिधि रुचिरा कम्बोजले राष्ट्रसंघीय विश्वव्यापी सञ्चार विभागकी उपसचिव मेलिसा फ्लेमिङलाई उक्त रकम बराबरको चेक प्रदान गरेकी हुन् ।

राष्ट्रसंघमा भारतीय नियोगले भाषागत समावेशिताका लागि स्थायी प्रतिनिधि कम्बोजमार्फत् भारतले राष्ट्रसंघलाई उक्त रकम प्रदान गरेको जानकारी दिएको छ ।

यसबाट हिन्दी भाषामा राष्ट्रसंघीय गतिविधिको मल्टिमिडिया सामग्री र समाचारको उत्पादनका लागि सहयोग पुग्ने अपेक्षा गरिएको छ ।

स्थायी प्रतिनिधि कम्बोजले भारत सरकारले हिन्दी भाषाको प्रवद्र्धनका लागि निरन्तर लागि रहने उल्लेख गरेकी छिन् ।