कासिन न्यूज,
काठमाडौं ।
खाजा, पानी र स्टेशनरीको व्यवस्था हुन्छ खाना र बस्ने बासको व्यवस्था सदस्य आफैले गर्नु पर्ने छ । नेकपा माओवादी केन्द्रले एक परिपत्र जारी गरि आफना सदस्यहरुलाई सो कुरा जानकारी गराएको छ ।
बुधबार बिहान ११ बजे देखी सुरु हुने माओवादी केन्द्रको केन्द्रिय समितिको बैठक पाँच दिन सम्म चल्ने छ । सो अवधिभर सदस्यहरुले आफनो व्यवस्था आफैले गर्नु पर्ने छ ।
माओवादी केन्द्रका कार्यालय सचिव डोरप्रसाद उपाध्यायले बैठक अवधिभर बैठकमा सहभागीहरुले खाने–बस्ने व्यवस्था आफैं मिलाउनुपर्ने बताए ।
बैठक हलको भाडा, मञ्च व्यवस्थापन, केन्द्रीय सदस्यहरुलाई खाजा, पानी, स्टेशनरी, झण्डा, ब्यानर लगायत बैठक व्यवस्थापनका काममा करिब २० लाख खर्च हुने अनुमान माओवादी केन्द्रले गरेको छ । प्रज्ञा भवनको ठूलो हल बुकिङका लागि मात्रै १० लाख भुक्तानी गरिएको केन्द्रीय कार्यालय स्रोतले बतायो ।

बैठकमा हुने खर्च पार्टीका नेता–कार्यकर्ताहरुको लेबी र केन्द्रीय सदस्यहरुको प्रवेश शुल्कबाट व्यवस्थापन गर्ने माओवादीले जनाएको छ । केन्द्रीय समिति बैठकमा सहभागीहरुलाई जनही पाँच सय रुपैयाँ प्रवेश शुल्क तोकिएको छ ।
बैठकमा ३८५ जना केन्द्रीय सदस्य, १९८ जना वैकल्पिक केन्द्रीय सदस्य, ७५ जना केन्द्रीय आयोगका सदस्य र १०० जना प्रदेश पदाधिकारी गरी जम्मा ७५८ जना सहभागी हुने नेकपा माओवादी केन्द्रले जनाएको छ ।
बैठकमा समसामयिक राजनीतिक विषयका साथै विचार मिल्ने पार्टीसँग एकता गर्ने लगायतका विषयमा छलफल हुने छ ।
बैठकमा प्रधानमन्त्री एवं अध्यक्ष पुष्पकमल दाहाल प्रचण्डले राजनीतिक प्रतिवेदन पेश गर्ने छन् । त्यसअघि महासचिव देवप्रसाद गुरुङले बैठकका एजेण्डाबारे जानकारी गराउने छन् । बैठक सामाजिक सन्जालबाट लाइभ गर्ने माओवादीको तयारी छ ।