कासिन न्यूज,
काठमाडौं ।
विंगर साडियो माने जर्मन क्लब बायर्न म्युनिख छाडेर साउदी अरबको अल नासरमा अनुबन्धित भएका छन् । बायर्नले मंगलबार एक विज्ञप्तिमार्फत दुई क्लबबीच मानेको ट्रान्सफरका लागि सहमति भएको जनाएको छ । गत सिजन बायर्नबाट जर्मन लिग जितेका सेनेगलका स्टार माने जम्न भने सकेनन् ।

आन्तरिक द्वन्द्वकै कारण क्लबले उनलाई बेचेको हो । मानेले अब अल नासरमा रोनाल्डोसँग आक्रमणमा साझेदारी गर्नेछन् । रोनाल्डो गत जनवरीमा साउदी गएसँगै युरोपका शीर्ष क्लबबाट अन्य खेलाडी पनि त्यसतर्फ आकर्षित हुन थालेका छन् । अल नासरले इन्टर मिलानबाट मार्सेलो ब्रोजोभिच, म्यानचेस्टर युनाइटेडबाट एलेक्स टेलेस र लेन्सबाट सेको फोफाना भित्र्याइसकेको छ ।
मानेकै पूर्व क्लब लिभरपुलबाट कप्तान जोर्डन हेन्डरसन, रोबर्टो फिर्मिनो र फाबिन्हो पनि साउदी पुगेका छन् । ब्यालोन डि’अर विजेता करीम बेन्जेमा, चेल्सीका एनगोलो कान्टे पनि साउदी क्लबबाट खेल्दैछन् ।

गत साता म्यानचेस्टर सिटीका रियाद माहरेज पनि साउदी आएपछि प्रशिक्षक पेप गुआर्डीओलाले युरोपेली क्लबले यसबारे शतर्क हुनुपर्ने धारणा राखेका थिए ।