कासिन न्यूज,
काठमाडौं ।
जिल्ला अदालत, काठमाडौंले हिरासतमा राखेर अनुसन्धान गर्नको लागि अनुमति नदिएपछि अधिवक्ता भगवती पाण्डे ‘शीतल’ थुनामुक्त भएकी जिल्ला प्रहरी परिसर, काठमाडौंका एसपी कुमुध ढुंगेलले जानकारी दिएका छन् । अधिवक्ता ‘शीतल’ विवादास्पद अभिव्यक्ति दिएको आरोपमा पक्राउ परेकी थिइन ।
एसपी ढुंगेलका अनुसार प्रमाण नष्ट गर्ने अवस्था नभएको भन्दै अदालतले हिरासतमा राख्न म्याद दिएन । त्यसपछि दुई साताअघि तामाङ, मगर समुदायका व्यक्तिहरुले दिएको उजुरीको आधारमा बुधबार बिहान पक्राउ गरिएकी उनलाई थुनामुक्त गरिएकोे हो ।
अधिवक्ता पाण्डेले एक अन्तर्वार्तामा मुस्लिम, मगर, तामाङलगायत समुदायको विवाह संस्कारलाई लिएर गरेको टिप्पणीप्रति ती समुदायले आपत्ति जनाएका थिए । उनीहरुले पाण्डेलाई पक्राउ गरेर कारबाही गर्नुपर्ने माग राखेर प्रदर्शन पनि गर्दै आएका थिए ।