कासिन न्यूज,
बाँके (नेपालगञ्ज) ।
नेपालगञ्जमा मंगलबार दिउँसो १ बजेदेखि कर्फ्यु लगाइएको कर्फ्यु तेस्रो दिन पनि जारी रहेको छ। नेपालगञ्जका चोकचोकमा ठूलो संख्यामा प्रहरी तैनाथ छन्। अत्यावश्यक काममा हिँडेका बाहेकलाई बाहिर निस्किन दिइएको छैन।

कर्फ्युलाई विस्तारै खुकुलो बनाउदै हटाउन सर्वदलीय सर्वपक्षीय बैठकले सुरक्षा समितिलाई अनुरोध गरिसकेको छ।

बिहिबार सुरक्षा समितिको बैठक बस्ने र यो बैठकले कर्फ्युलाई खुकुलो बनाउँदै हटाउने विश्वास गरिएको छ।

सहायक प्रमुख जिल्ला अधिकारी टोपेन्द्रबहादुर केसीले सुरक्षा समितिको बैठकले कर्फ्युका विषयमा केही निर्णय गर्ने बताए। ‘बैठकले कर्फ्युलाई खुकुलो बनाउने कि हटाउने भन्ने केही निर्णय गर्ला’, केसीले भने।

मंगलबार एकाएक अशान्त बनेको नेपालगञ्ज त्यसपछि शान्त रहेको छ। बुधबार दिनभरि नै नेपालगञ्ज शान्त रह्यो। बिहिबार पनि कतै कुनै अराजक गतिविधि देखिएको छैन।