कासिन न्यूज,
अर्घाखाँची ।

कांग्रेस सहमहामन्त्री बद्री पाण्डेले २०१५ सालदेखि हालसम्म एउटै पद्धतिमा हिँडेको कांग्रेसलाई बदल्नुपर्ने आवश्यक रहेको बताएका छन् । जनताको चाहनाअनुरुप पाटीलाई बदल्न उर्जा, आशा सहितको अभिभावकत्वको खाँचो रहेको उनको भनाइ थियो ।

कांग्रेस अर्घाखाँचीले आयोजना गरेको दुई दिने प्रशिक्षण कार्यक्रम समापन समारोहलाई शनिबार सन्धिखर्कमा सम्बोधन गर्दै पाण्डेले कांग्रेसलाई रुपान्तरण गर्नुपर्ने अहिलेको आवश्यकता रहेको औंल्याए । ‘युवाहरु निराशाजनक अवस्थाबाट पलायन भएका छन्,’ उनले भने, ‘युवालाई आशा जगाउन नसके अवस्था जटिल बन्छ । सरकारले यतातिर ध्यान दिनुपर्छ ।’

सरकारमा रहेको कांग्रेसका मन्त्री र नेताहरुले जनताको चाहना अनुसार काम गर्नुपर्ने उनले बताए । मुलुकमा राजनीति क्रान्ति सकिएकाले अब आर्थिक क्रान्तिसहित अवस्थालाई बदल्नुपर्ने पाण्डेले बताए । हरेक परिवर्तनको नेतृत्व गरेको कांग्रेसले अब विकास र समृद्धिको पनि नेतृत्व गर्नुपर्ने पाण्डेको भनाइ छ ।

कांग्रेसको आन्तरिक पार्टी संगठन सुदृढ बनाउने उद्देश्यले कांग्रेसले सन्धिखर्कमा दुई दिने बृहत प्रशिक्षण कार्यक्रम आयोजना गरेको थियो । कांग्रेस नेता देवराज चालिसे, केन्द्रीय सदस्य पुष्पा भुसाल, लम्बिनी प्रदेश सभापति अमरसिंह पुन, पूर्वकेन्द्रीय सदस्य रेवतीप्रसाद भुसाल लगायतका नेताले कार्यकर्तालाई प्रशिक्षण दिएका थिए ।