कासिन न्यूज,
काठमाडौं ।

एकदिवसीय विश्वकपमा नेदरल्याण्ड्सले दक्षिण अफ्रिकाविरुद्ध ऐतिहासिक जित हात पारको छ । मंगलबार धर्मशालामा भएको खेलमा नेदरल्याण्ड्सले दक्षिण अफ्रिकालाई ३८ रनले पराजित गरेको हो ।

वर्षाका कारण ४३ ओभरमा छोट्याइएको खेलमा २ सय ४६ रनको लक्ष्य पछ्याएको दक्षिण अफ्रिकाले ४२.५ ओभरमा सबै विकेट गुमाएर २०७ रन मात्र बनाउन सक्यो ।

दक्षिण अफ्रिकाका लागि डेभिड मिलरले सर्वाधिक ४३ रन बनाए । त्यस्तै केशव महाराजले ४०, हेनरिच क्लासेनले २८, जेराल्ड कोट्जीले २२ तथा क्वीनटन डी ककले २० रन बनाए ।

नेदरल्याण्ड्सका लागि लोगन भान विकले ३ तथा पाउल भान मिकरेन, रोलफ भान डर मर्वे र बास डी लिडले २–२ विकेट लिए ।

त्यसअघि टस हारेर पहिले ब्याटिङ गरेको नेदरल्याण्ड्सले ८ विकेटको क्षतिमा २ सय ४५ रन बनाएको थियो । नेदरल्याण्ड्सका लागि कप्तान स्कट एडवार्डस्ले सर्वाधिक ७८ रन बनाए । त्यस्तै रोलफ भान डर मर्वेले २९, अजय दत्तले २३ तथा तेजा निदामानुरुले २० रन बनाए ।

दक्षिण अफ्रिकाका लागि लुंगी एनगिडी, मार्को जानसेन र कागिसो रबाडाले २–२ विकेट लिए भने जेराल्ड कोटजी र केशव महारजले १–१ विकेट लिए ।