कासिन न्यूज,
कञ्चनपुर ।

कञ्चनपुरमा अव्यवस्थित बसोवासीलाई जग्गाधनी पुर्जा वितरण गर्न सुरु गरिएको छ । राष्ट्रिय भूमि आयोग कञ्चनपुरले यहाँका अव्यवस्थित बसोवासीलाई जग्गाधनी पुर्जा वितरणलाई तीव्रता दिएको हो ।

नापी सकिएका ठाउँका स्थानीयलाई धमाधम जग्गाधनी पुर्जा वितरण भइरहेको राष्ट्रिय भूमि आयोग कञ्चनपुरका अध्यक्ष देवेन्द्र ढुङ्गानाले बताए । “पहिलो चरणमा विगतका आयोगका अपुरा कामअन्तर्गत अव्यवस्थित बसोवासीलाई लालपुर्जा वितरण गर्ने काम भइरहेको छ”, उनले भने, “जिल्लाभर नापीको काम आधा सकिएको छ ।”

उनका अनुसार अहिलेसम्म यहाँको वेदकोट नगरपालिका र कृष्णपुर नगरपालिकामा जग्गाधनी पुर्जा वितरण गरिएको छ । वेदकोट नगरपालिका–८ का ७० र कृष्णपुर नगरपालिका–७ का ६५ गरेर कुल एक सय ३५ जनालाई जग्गाधनी पुर्जा हस्तान्तरण गरिएको छ ।

उपभोग गरेको वर्षौँपछि जग्गाधनी पुर्जा पाएपछि स्थानीय बासिन्दा निकै खुसी भएका छन् । “स्थानीय तहले लालपुर्जाका लागि सिफारिस गरेर पठाउँछ, कसैको दाबी रहेमा निवेदन गर्न सक्ने गरी १५ दिने सूचना निकाल्छौँ”, उनले भने, “दाबी परे पालिकाको सिफारिस फिर्ता पठाउँछौँ, नभए निर्णय गरेर राजस्व तिरेपछि लालपुर्जा वितरण गरिन्छ ।”

नापी सकिएका ठाउँमा दसैँलगत्तै लालपुर्जा वितरण गर्ने तयारी भइरहेको उनले बताए । नापी सकिएका वेदकोट र कृष्णपुरमा जग्गाधनी पुर्जा वितरण भइरहेको छ । भूमि आयोग कञ्चनपुरका अनुसार सदरमुकामको भीमदत्त नगरपालिका–४, १५, १७ मा नापीको काम सकिएको छ ।

दोधारा चाँदनीको वडा नं १ र २ मा नापी सकिएको छ भने वडा नं ८ मा नापी चलिरहेको छ । “स्थानीय तहले खटाएको नापी टोलीले धमाधम काम गरिरहेको छ”, अध्यक्ष ढुङ्गानाले भने, “पहिलो चरणमा नापी सकिएका ठाउँमा लालपुर्जा वितरण हुन्छ ।” बेलौरी नगरपालिका–४, ८, ९ र १० गरेर चार वडामा जग्गा नापी गर्ने काम सकिएको छ । पुनर्वास नगरपालिकाका चार, शुक्लाफाँटा र लालझाडीमा दुई–दुई तथा बेलडाँडी गाउँपालिकाको एक वडामा जग्गा नापी सम्पन्न भएको छ । भूमि आयोग कञ्चनपुरमा जिल्लाभर अव्यवस्थित बसोवासका ७० हजार बढी निवेदन परेका छन् ।

भूमिहीन दलित, सुकुम्वासीका चार हजार पाँच सय र अधुरो काम (नापनक्सा र फिल्डबुक भएका र सेतो पुर्जा पाएका) छ हजार पाँच सयले निवेदन दिएका छन् । पहिलो चरणमा अव्यवस्थित बसोवासीको छानबिन गरेर पुर्जा वितरणपछि भूमिहीन दलित र भूमिहीन सुकुम्वासी तथा अधुरो कामका निवेदनमाथि छानबिन गर्ने भूमि आयोग कञ्चनपुरले तयारी गरेको छ ।