कासिन न्यूज,
काठमाडौं ।

विश्वकप क्रिकेटमा श्रीलंकाविरुद्ध अफगानिस्तानले सानदार जित दर्ता गरेको छ । श्रीलंकालाई अफगानिस्तानले सात विकेटले पराजित गर्दै अर्को महत्वपूर्ण जित दर्ता गरेको हो । यो जितसँगै अफगानिस्तानको अघिल्लो चरण प्रवेश गर्ने सम्भावना बलियो बनेको छ ।

जितका लागि श्रीलंकाले दिएको २४२ रनको लक्ष्य अफगानिस्तानले ४५.२ ओभरमा मात्र ३ विकेट गुमाएर भेट्टायो । अफगानिस्तानका लागि रहमत शाहले इब्राहिम जादरानसँग दोस्रो विकेटका लागि ७३ रनको साझेदारी गरे । जादरान ३९ र शाह ६२ रनमा आउट भए । सुरुवात भने राम्रो रहेनन् । खाता नखोल्दै अफगानिस्तानले आफ्नो पहिलो विकेट गुमाएको थियो । कप्तान शाहिदीले अजमतुल्लाह मिर्जासँग अविजित १११ रनको साझेदारी गर्दै टिमलाई जित दिलाए । मिर्जा ७३ र शाहिदी ५८ रनमा अविजित रहे ।

यसअघि भारतको पुनेमा टस हारेर ब्याटिङको निम्तो पाएको श्रीलंकाले ४९.३ ओभरमा २४१ रन बनाउँदा सबै विकेट गुमाएको थियो । २२ रन जोड्दा पहिलो विकेटका रुपमा दिमुथ करुणारत्ने आउट भए । तेस्रो नम्बरमा आएका कुशल मेन्डिसले पथुम निसांकासँग ६२ र सदीरा समरविक्रमासँग ५० रनको साझेदारी गर्दै श्रीलंकाको पारी उकासे । पथुम ४६ रनमा आउट भए । श्रीलंकाका एन्जेलो म्याथु २३ र महेश थीक्षणा २९ को योगदान दिए ।

अफगानिस्तानका फजलहक फारुकीले ४ विकेट लिए । मुजिवर रहमानले २ तथा रशिद खान र अजमतुल्लाह उमरजाईले १–१ विकेट हात पारे ।