कासिन न्यूज,
काठमाडौं ।

एसीसी १९ वर्षमुनिको एसिया कप क्रिकेटमा नेपाल दोस्रो खेलमा पनि पराजित भएको छ । आइतवार अफगानिस्तानसँगको खेलमा नेपाल ७३ रनले पराजित भयो ।

अफगानिस्तानले दिएको २ सय ६२ रनको लक्ष्य पछ्याएको नेपाल ४० ओभर १ बलमा १ सय ८८ रनमा अल आउट भयो । नेपालका अर्जुन कुमालले सर्वाधिक ९१ रन बनाए पनि अन्य खेलाडीले राम्रो अङ्कमा रन जोड्न सकेनन् । नेपालका कप्तान देव खनाल २४, गुल्शन झा १७, दीपक बोहरा १५, दिपेश कँडेल ११, सुवाश भण्डारी ८, उत्तम मगर ४ तथा विपिन रावल, आकाश त्रिपाठी र हेमन्त धामी शून्य रनमा आउट भए । बलिङतर्फ अफगानिस्तानका फरिदून दवूदजाई र नसिर खानले समान ३ तथा मोहम्मद युनुसले २ विकेट लिए ।

यसअघि दुबई आईसीसी एकेडेमी ग्राउन्ड २ मा टस हारेर ब्याटिङको निम्तो पाएको अफगानिस्तान ४९ ओभर ३ बलमा २ सय ६१ रनमा अल आउट भयो । अफगानिस्तानका जम्शिद जद्रानले शतक बनाए । उनी १ सय ५२ बलमा १ सय ६ रन बनाएर रिटायर्ड आउट भए । यस्तै नुमन शाहले ६० रन बनाए । बलिङतर्फ नेपालका हेमन्त धामी, गुल्शन झा र सुवाश भण्डारीले समान २ विकेट लिए ।

नेपाल पहिलो खेलमा पाकिस्तानसँग ७ विकेटले पराजित भएको थियो । अब नेपालले समूहको अन्तिम खेलमा पर्सि मङ्गलवार भारतसँग खेल्नेछ । यो खेल आईसीसी एकेडेमी ओभल–२ मा बिहान सवा ११ बजे शुरु हुने छ ।

प्रतियोगितामा ८ देश सहभागी छन् । नेपाल रहेको समूह “ए” मा भारत, पाकिस्तान र अफगानिस्तान छन् । त्यस्तै समूह “बी” मा घरेलु टोली यूएई, जापान, श्रीलङ्का र बङ्गलादेश छन् ।

मङ्सिर २९ गते सेमिफाइनल खेल हुनेछ । सेमिफाइनलमा समूह “ए” को विजेता र समूह ुबीु को उपविजेता तथा समूह “बी” को विजेता र समूह “ए” को उपविजेता खेल्नेछन् । सेमिफाइनलमा पुग्न कम्तीमा दुई खेल जित्नुपर्ने हुन्छ । प्रतियोगिताको फाइनल खेल आउँदो पुस १ गते हुनेछ ।