कासिन न्यूज,
जनकपुरधाम ।

मिथिलाञ्चलका धार्मिक तथा ऐतिहासिक रामजानकी विवाहपञ्चमी महोत्सवको तेस्रो दिन बिहीबार धनुषयज्ञ मनाइएको छ । तेत्रा युगमा भगवान श्रीरामले धनुष भाँचेर सीतासँग विवाह भएको धार्मिक शास्त्रहरूमा उल्लेख गरिएको हुदाँ भगवान् रामको प्रतिकात्मक रुप धारण गरेका बालबालिकाहरूले पनि धनुष भाँचेर धनुषयज्ञ मनाइँन्छ ।

रामायणमा वर्णन गरिएअनुसार पर्शुरामले मिथिलाका राजा जनकलाई उक्त धनुष प्रदान गरेका थिए । राजा जनकले धनुष उचाल्ने महाशक्तिशालीसँग मात्र छोरी सीताको विवाह गर्ने निधोका साथ धनुषयज्ञ आयोजना गरे । यसमा शक्तिशाली राजा र राजकुमारहरू सहभागी भए पनि कसैले धनुष हल्लाउन सकेनन् ।

अन्त्यमा, आयोध्याबाट आएका दशरथ पुत्र रामले यज्ञमा राखिएको धनुषलाई सहजै उठाएर प्रत्यन्जा लगाउन थालेपछि तीन टुक्रा भएको रामायणमा उल्लेख छ । धनुषका तीन टुक्रामध्ये एक आकाश, एक धनुषाधाम र एक भारतको गिरिजास्थान गएको धार्मिक विश्वास छ ।

यसअघि बुधबार फुलवारी लिला र मंगलबार नगरदर्शन कार्यक्रम सम्पन्न भएको थियो । तेत्रा युगमै भारत अयोध्याका दशरथका छोरा पुरुषोत्तम राम र राजा जनककी छोरी सीताबीच वैवाहिक बन्धनमा बाँधिएको सम्झनामा प्रत्येक वर्ष मंसिर शुल्क पञ्चमीमा जनकपुरधामामा विवाहपञ्चमी महोत्सव मनाइन्छ ।