कासिन न्यूज,
काठमाडौं ।

नेपाल सुपर लिग फुटबल प्रतियोगिताको ट्रफी सार्वजनिक भएको छ । आयोजक नेपाल स्पोर्ट्स एण्ड इभेन्ट म्यानेजमेन्टले शुक्रबार त्रिपुरेश्वस्थित दशरथ रंगशालमा ट्रफी सार्वजनिक गरेको हो ।

फाइनल खेलको एक दिन अगाडी सार्वजनिक गरिएको ट्रफी पछि दुबै टोलीका कप्तानहरुले आफूहरु फाइनल उपाधिका लागि तयार भएको बताए । धनगढीका कप्तान देवेन्द्र तामाङले पहिलो संस्करणमा फाइनलमा पुगेर पनि उपाधि जित्न नसकेको कुरालाई याद गर्दै यो सिजन उपाधिका लागि तयारी गरेको बताए ।

यता ललितपुरका कप्तान अनन्त तामाङले यो सिजन जित्नका लागि आफूहरु तयार भएको बताए । नेपाल सुपर लिगको दोस्रो संस्करणको फाइनलमा धनगढी एफसी र ललितपुर सिटी एफसी भिड्दैछन् । धनगढी एफसी लिग चरणमा दोस्रो हुँदै पहिलो क्वालिफायरमा पुगेको थियो । पहिलो क्वालिफायरमा उसले पोखरा थन्डर्स एफसीमाथि पेनाल्टीमा सनसनीपूर्ण जित हात पारेको थियो ।

ललितपुर एफसीले इलिमिनेटरमा काठमाडौं रेजर्स एफसीलाई पराजित गर्दै दोस्रो क्वालिफायरमा स्थान बनाएको थियो । दोस्रो क्वालिफायरमा उसले पनि पोखरा थन्डर्सलाई हराउँदै फाइनलमा स्थान बनाएको हो । लिगचरणमा भने ललितपुर चौथो बन्दै इलिमिनेटरमा पुगेको थियो ।

नेपाल सुपर लिगको उपाधि जित्ने टोलीले ७० लाख रुपैयाँ पुरस्कार पाउने छ ।