कासिन न्यूज,
काठमाडौं ।
प्रधानमन्त्री पुष्पकमल दाहाल प्रचण्डका प्रमुख राजनीतिक सल्लाहकार हरिबोल गजुरेलले दिएको राजीनामा एक महिना पुग्न लाग्दासमेत स्वीकृत भएको छैन । प्रधानमन्त्री दाहाल सँग असन्तुष्टि जनाउँदै गजुरेलले मंसिर २० गते राजीनामा दिए पनि अझैसम्म होल्ड भएर बसेको हो । गजुरेलले आफूले दिएको राजीनामा हालसम्म स्वीकृत नभएको पुष्टि गरे ।
राजीनामा अहिलेसम्म स्वीकृत भएको छैन । किन स्वीकृत भएन उतै सोध्नुहोला’, उनले भने । यस्तै राष्ट्रियसभामा जान लागिएको चर्चाबारे उनले लोभी पापीहरूले विषयान्तर गर्नका लागि चलाएको हल्ला मात्र भएको बताए ।
‘म राष्ट्रिय सभा जान राजीनामा दिएको होइन । विषयान्तर गर्नका लागि हल्ला चलाएका हुन’, उनले भने, ‘मैले जुन विषय उठाएर राजीनामा दिएको हो । त्यसलाई विषयान्तर गर्न खोजियो ।’
गत वर्ष सिन्धुली–२ बाट प्रतिनिधिसभाको टिकट खोसिएपछि असन्तुष्ट भएका उनलाई प्रधानमन्त्री दाहालले गत माघमा मन्त्रीसरह सुविधा दिने गरि राजनीतिक सल्लाहकारमा नियुक्त गरेका थिए । पछिल्लो समय सचिवालयमा आफ्नो भूमिकाको मूल्याङ्कन नभएकोमा उनी असन्तुष्ट देखिन्थे । यस्तै सुशासनको पक्षमा सरकारले चालेको कदमबाट ब्याक भएकोमा पनि उनी सन्तुष्ट देखिएका छैनन् । सरकारको भूमिकाले जनता निराश भएको उनको निष्कर्ष छ । बाँकी विषयमा राजीनामा स्वीकृत भएपछिमात्र बोल्ने उनले बताएका छन् ।