कासिन न्यूज,
काठमाडौं ।

ठूलो रकम सरकारलाई तिर्नुपर्ने बक्यौता रकम रहेको भन्दै विवादमा परेको कम्पनी रिलायन्स स्पिनिङ मिल्सले बुक बिल्डिङबाट आईपीओ जारी गर्ने अनुमति पाएको छ।

झण्डै २ अर्ब रुपैयाँ बक्यौता दाबी भइरहेको कम्पनीलाई धितोपत्र बोर्डले बिहीबार अनुमति प्रदान गरेको हो। नेपाल विद्युत् प्राधिकरणले विद्युत् उपभोग गरेबापतको पैसा नतिरेको आरोप लगाइरहेका बेला बोर्डले सेयर निष्काशनको अनुमति दिएको हो।

कस्तो छ रिलायन्सको वित्तीय अवस्था ?
रिलायन्स स्पिनिङको बिजुलीको दायित्व नै २ अर्ब रुपैयाँ देखिएको छ। यदि यो दायित्व भुक्तान गर्नुपर्ने स्थिति रहेमा कम्पनी ठूलो नोक्सानीमा समेत जाने देखिएको छ।

रेटिङ एजेन्सीले गरेको रेटिङ रिपोर्टअनुसार गत आर्थिक वर्षमा मिल्सले १० अर्ब ६० लाख रुपैयाँको कारोबार गरेको छ। यो कारोबार भने विगतभन्दा घटेको हो।

वार्षिक ४२ हजार ७५० टन उत्पादन क्षमता रहेको यो उद्योगले सिन्थेटिक धागोे पोलिस्टर, भिस्कोस, एक्क्रिलिकरब्लेन्डेड र पोलिस्टर टेक्सचर्ड धागो उत्पादन गर्ने गर्छ। खनार र दुहबीमा यसको कारखाना सञ्चालनमा छन्।