कासिन न्यूज,
ललितपुर ।
नेपाली कांग्रेसको महासमिति बैठक ललितपुरको गोदावरीमा जारी छ । बैठकमा पार्टी उपसभापति पूर्णबहादुर खड्काले नीति प्रतिवेदन प्रस्तुत गरेका छन् ।

महामन्त्री गगनकुमार थापाले तयार पारेको सांगठनिक प्रतिवेदनमा चुनावअघि गठबन्धन नगर्ने उल्लेख गरेकोमा सभापति शेरबहादुर देउवासहित संस्थापन पक्षका नेताहरू नै असन्तुष्ट थिए । सोही कारण बैठकको तालिका बिथोलिएकोमा कांग्रेसका शीर्ष नेताहरुबीच उक्त प्रतिवेदनमा आंशिक संशोधन गर्ने सहमति जुटेपछि महासमिति बैठक अघि बढ्ने बताइएको थियो ।

आगामी चुनावमा आफ्नै तागतमा एक्लै लड्ने संकल्प गर्ने उल्लेख गरेर महामन्त्री थापाको प्रतिवेदन परिमार्जन गर्न कांग्रेस नेताहरु सहमत भएका हुन् । महामन्त्री थापाको प्रतिवेदनलाई गएराति नै टुंगो लगाइएको छ ।

सहमतिपश्चात बैठक मंगलबार बिहान ९ बजे सुरु हुने बताइए पनि सदस्यहरू समयमै आई नपुगेकाले निर्धारित समयभन्दा करिव दुई घण्टा ढिलो गरी सुरु भएको हो । महासमिति बैठकमा आज सबै प्रतिवेदन पेस हुने र छलफल सुरु हुने कांग्रेसले जनाएको छ ।

पार्टी प्रचार विभाग प्रमुख मीन विश्वकर्माले आज महासमिति बैठकमा नीति, सांगठनिक, समसामयिक, अर्थ र लेखासम्बन्धी प्रतिवेदनमाथि समूहगत छलफल हुने जानकारी दिए ।

मंगलबार बन्दसत्रमा उपसभापति पूर्णबहादुर खड्काको नीति प्रतिवेदनका साथसाथै, महामन्त्री गगन थापाको सांगठनिक प्रतिवेदन, अर्का महामन्त्री विश्वप्रकाश शर्माको राजनीतिक प्रतिवेदन पेस हुने छ । त्यस्तै अर्थमन्त्री प्रकाशशरण महतको अर्थतन्त्रको वर्तमान अवस्था र चुनौती र श्याम घिमिरेको लेखा प्रतिवेदन पनि पेस हुनेछ ।

सभापति शेरबहादुर देउवाले सोमबार ललितपुरको गोदावरीमा उद्‍घाटन गरेपछि सुरु भएको महासमिति बैठक फागुन १० गतेसम्म चल्ने छ ।