कासिन न्यूज,
काठमाडौं ।
काठमाडौंमा सिक्री लुटपाट गरेर उतपात मच्चाई रहेका तीन जना लुटेराहरुलाई प्रहरी पक्राउ गरेको छ । जिल्ला प्रहरी परिसर काठमाडौंको टोलीले लुटेराहरुलाई पक्रेको हो । पक्राउ पर्नेमा गोरखा घर भएको हाल कपुरधारा बस्ने ३८ वर्षीया उषा विष्ट,सर्लाही घर भएका रामहरी खड्का र हरि शंकर चौधरी रहेका छन् ।
नेपाल प्रहरीका अनुसार पक्राउ परेकी विष्टले बैसाख ३० गते सुन्धारा बाट ट्याक्सीमा सवार कविराज नेपालीले घाँटीमा लगाएको सुनको सिक्री लुटेर भागेकी थिइन । सिक्री लुटिए पछि नेपालीले दिएको जाहेरीको आधारमा प्रहरी परिसर काठमाडौंको टोलीले विष्टलाई पछ्याउँदै गर्दा माछापोखरीबाट उनलाई पक्राउ गरेको हो । त्यस्तै विष्टले लुटेको उक्त सिक्री रामहरी खड्काले हरिशंकर चौधरीलाई बेचेका थिए ।
प्रहरी सुन लुटपाट देखी बेचबिखन सम्मको संग्लनता देखीएपछि तिनै जनालाई प्रहरीले नियन्त्रणमा लिएको हो । अहिले उनीहरुलाई अनुसन्धानको दायरामा राखिएको छ ।