कासिन न्यूज,
पोखरा।
संविधानको धारा १६८ (५) मा गएर बहुमत पु¥याउन सक्ने कुनै एक प्रदेश सभा सदस्य मुख्यमन्त्री बन्न सक्ने परिस्थितिमा ह्वीप पनि नलाग्ने भएकाले त्यही अनुसार गर्ने धेरैको अनुमान थियो । तर, फणिन्द्र देवकोटाले मत नदिँदा सुरेन्द्रराज पाण्डेको सरकार ढलेर अर्को सरकार बन्ने स्थिति पनि नहुने देखेपछि ह्वीप लगाए पनि समर्थन गर्ने निर्णयमा पुगेका हुन् ।
देवकोटा फ्लोर क्रस गरेर कांग्रेसका मुख्यमन्त्री सुरेन्द्रराज पाण्डेलाई विश्वासको मत दिएको भोलिपल्ट ऊर्जा, जलस्रोत तथा खानेपानी मन्त्री नियुक्त भए । उनी ४ मंसिर २०७९ को प्रदेशसभा चुनावमा नेकपा माओवादी केन्द्रको चुनाव चिह्न लिएर उठेका नेपाल समाजवादी पार्टीका सांसद हुन् ।
प्रचण्डले एमालेलगायतसँग समीकरण गरेपछि गण्डकीमा बनेको खगराज सरकारमा फणिन्द्रले मन्त्री हुने आकांक्षा राखेका थिए । देवकोटाले मन्त्री त बन्न पाएनन् तर माओवादी कोटाबाटै सामाजिक विकास समिति सभापति बनेका थिए ।
पछिल्लो समय नेपाल समाजवादी पार्टीको एक समूहले माओवादी केन्द्रसँग एकताको सहमति गरिसकेको छ । तर एकताको विपक्षमा रहेका बाबुराम भट्टराईसँगै छन् देवकोटा पनि ।
माओवादीले उनलाई कारबाही गर्ने बताइसकेको छ तर डा. भट्टराई र देवकोटाले भने कारबाही गर्न नमिल्ने बताइरहेका छन् । देवकोटाको कारबाहीबारे विभिन्न बहस भइरहेका बेला संसद जोगाउनका निम्ति भन्दै पाण्डेलाई विश्वासको मत दिएर मन्त्री बनेका देवकोटाको मन्त्रालय ऊर्जा, जलस्रोत तथा खानेपानी भौतिक पूर्वाधारपछि सबैभन्दा धेरै बजेट भएको मन्त्रालय हो ।