कासिन न्यूज,
काठमाडौं ।
नेपाल र अमेरिकाको कानूनलाई झेल्दै अमेरिकामा आइसिसी टि २० विश्वकपमा सहभागी हुन् पुगेका लेग स्पिनर सन्दिप लामिछानेले दक्षिण अफ्रिका सँग शनिवार हुने खेलको अभ्यास थालेका छन् ।

नेपालस्थित अमेरिकी दुतावासले लामिछानेलाई‌ भिसा उपलब्ध नगराएपछि केही दिनको माथापिच्छी पछि उनले खेलमा सहभागी हुने मौका पाए । अब नेपालले खेल्ने अन्तिम २ खेलका लागि नेपाल क्रिकेट संघ (क्यान)ले लामिछानेलाई क्यानाडा हुँदै सेन्ट भिन्सेन्ट पठाएको छ।
२ खेलमा राम्रो खेलेर अघि बढ्ने सम्भावना रहेको नेपालले शनिबार दक्षिण अफ्रिकासँग पहिलो पटक खेल्दैछ । बलात्कार मुद्दामा सन्दीपलाई उच्च अदालत पाटनले गत महिना सफाई दिएपछि क्यानले निलम्बन फुकुवा गर्दै उनलाई विश्वकप टोलीमा‌ समावेश गरेको थियो।
प्रतिश जिसीलाई हटाउँदै उनको ठाँउमा सन्दीपलाई १४ मा राखिएको छ। उनी दक्षिण अफ्रिकाको प्लेइङ ११ मा पर्ने सम्भावना छ। नेपालले सुपर ८ पुग्नका‌ लागि अन्तिम २ खेल जित्नै पर्ने हुन्छ।
सेन्ट भिन्सेन्टमा नेपाल र दक्षिण अफ्रिका बीच जुन शुक्रबार (नेपाली समय अनुसार शनिबार बिहान ५ः१५ बजे) र नेपाल र बंगलादेशबीच आइतबार (नेपाली समय अनुसार सोमबार बिहान ५ः१५ ) हुने तालिका छ।
आफ्नो पहिलो खेलमा नेपाल नेदरल्यान्ड्ससँग ६ विकेटले‌ पराजित भएको थियो। समूहबाट ६ अंकसहित दक्षिण अफ्रिका सुपर एटमा पुगिसकेको छ। बंगलादेशको ४ अंक छ। नेदरल्याण्ड्स २ अंक तथा नेपाल १ अंक छ । १ अंक जोडेको श्रीलंका प्रतियोगिताबाट बाहिरिएको छ।