कासिन न्यूज,
काठमाडौं ।
सत्ता परिवर्तन सँगै सबैभन्दा बढी प्रभाव पर्ने संगठन मध्ये अग्रभागमा आउने संगठन हो नेपाल प्रहरी । नेपाल प्रहरीमा हुने सरुवा कार्यलाई  दुर्भाग्य भन्ने किअसल कार्य भन्ने त्यसको कुनै उत्तर छैन । सरुवा भएर गएको स्थानमा ५ महिना पनि पुगेको हुँदैन सत्ता परिवर्तनले प्रहरीलाई थला पारी हाल्छ । प्रहरीको नियमानुसार कुनै पनि अधिकृतलाई कुनै स्थानको कमाण्ड सम्हाल्ने अवधि पहिले नै तोकेर पठाए पनि सत्ता परिवर्तनको प्रभावले राम्ररी काम गर्न नपाउँदै कमाण्डरहरु सरुवा लिन बाध्य हुन्छन् ।

यही भेल फेरी नेपाल प्रहरीमा आएको छ । नेपाली कांग्रेस र नेकपा एमालेको गठबन्धनको सरकार बनेपछि गृह मन्त्रालयको जिम्मा कांग्रेसले पायो , गृहमन्त्रीको रुपमा रमेश लेखकलाई पठाएको छ ।लेखक गृहमन्त्री भएर आए सँगै प्रहरी मुख्यालयले आफना ५ प्रहरी उपरिक्षक(एसपी) र ९ प्रहरी नायब उपरिक्षक(डिएसपी)हरुको सरुवा गरिएको छ । जसले आफनो कमाण्ड अवधि नै पूरा गर्न नपाउँदै फिर्ता हुनु परेको छ ।

प्रहरी नियमावली–२०७१ अनुसार जिल्लामा कमाण्डर भएर बस्ने प्रहरी अधिकृतहरूको सरुवा १ वर्षमा गर्नुपर्ने व्यवस्था छ । तर, गृह मन्त्रालयमा नेतृत्व फेरिएपछि यो नियमले कुनै सरोकार राख्दैन ।  पूर्व गृहमन्त्री रवि लामिछानेले नियुक्त भएको १ महिनामा तराईका ६ जिल्लाका प्रहरी उपरीक्षकहरू सरुवा गरेका थिए । त्यसबेला महोत्तरीबाट श्याम कुमार राई र सर्लाहीबाट दयानिधि ज्ञवालीलाई ५१ दिनमा नै फिर्ता बोलाएका थिए ।

उता तनहुँका इन्चार्ज (एसपी) अपिल राज बोहरा २०८० फागुन १ मा सरुवा भएका थिए । त्यहाँ हाजिर भएको ५ महिनामा नै उनलाई हटाइएको छ । जुवाखालबाट ३ हजार ४ सय बरामद भएका ‘महिला समूह’ र बाघचाल खेल्नेहरूलाई मुद्दा चलाएको भन्दै उनलाई सरुवा गरिएको प्रहरी प्रधान कार्यालयका एक बरिष्ठ प्रहरी अधिकृतले कासिन न्यूज सँगको कुराकानीमा भने ।

स्थानीय कांग्रेस नेतृत्वको आग्रहमा गृहमन्त्री लेखकले उनलाई सरुवा गर्न आईजीपीलाई निर्देशन दिएका हुन् । बोहरालाई हटाएर तनहुँमा वीरेन्द्र बहादुर शाहीलाई पठाइएको छ । रौतहटको चन्द्रनिगाहापुरमा कार्यरत गौरव महतलाई प्रधान कार्यालयले ७ महिनामा हटाएको छ । उनी पुस ९ मा हाजिर भएका हुन् । महत कसैको कुरा नसुन्ने र कानुन बमोजिम कारबाही गर्ने स्वभावका अधिकृतको रूपमा चिनिन्छन् ।

प्रहरी प्रधान कार्यालयले कास्की स्थित वडा प्रहरी कार्यालय बैदाममा डीएसपी राजेन्द्र श्रेष्ठलाई पनि अवधि नपुग्दै काज सरुवा गरेको छ । डीएसपी श्रेष्ठलाई क्लब सञ्चालकको दबाबमा सरुवा गरेको आरोप छ । डीएसपी श्रेष्ठ २०८० असोजमा बैदाममा हाजिर भएका थिए । श्रेष्ठले क्लब–१६ मा कार्यरत दुई जना बाउन्सरलाई मुद्दा चलाएको कारण सो क्लबको संचालकको दबाबमा सरुवा गरिएको आरोप छ ।

बाउन्सरलाई मुद्दा चलाएपछि क्लब सञ्चालक रमेश कार्कीले प्रहरी प्रधान कार्यालय र अख्तियारमा उजुरी हालेर डीएसपीलाई सरुवा गर्ने लबिङ गरेको पोखराका व्यवसायीहरू बताउँछन् । रेस्टुरेन्ट व्यवसायी सङ्घ पोखराका अध्यक्ष नरेश भट्टराई भन्छन्, ‘पोखराका पर्यटन व्यवसायीहरुको नाममा उजुरी हालिएको रहेछ, व्यवसायीलाई त्यसबारे जानकारी छैन ।’

अहिले बैदाममा सन्तोष निरौलालाई पठाइएको छ । रौतहटको चन्द्रनिगाहापुरमा राजकुमार राईलाई पठाइएको छ । उदयपुरमा कार्यरत एसपी रमेश थापा र जिल्ला प्रहरी कार्यालय भोजपुरका डीएसपी सुदिप पाठकलाई पनि सरुवा गरिएको छ । भोजपुरमा डीएसपी युवराज तिमिल्सिनालाई खटाइएको छ ।