कासिन न्यूज , काठमाडौं –

अमेरिकी सञ्चारमाध्यमले राष्ट्रपतीय दौडमा ह्यारिसको प्रवेश रिपब्लिकनका लागि ‘कडा चुनौती’ भएको वर्णन गरेका छन् ।

अमेरिकी राष्ट्रपतीय निर्वाचनमा १०० दिनभन्दा कम समय बाँकी रहँदा उम्मेदवार डोनाल्ड ट्रम्प आफ्नो नयाँ प्रतिद्वन्द्वी कमला ह्यारिसलाई मध्यनजर गर्दै चुनावी रणनीति बदल्न बाध्य हुनुभएको छ ।

जुलाई २१ मा अमेरिकी राष्ट्रपति जो बाइडेनले उपराष्ट्रपति ह्यारिसलाई डेमोक्र्याटिक उम्मेदवारको रूपमा समर्थन गर्दै आफ्नो उम्मेदवारी फिर्ता लिएपछि रिपब्लिकनको रणनीति उथलपुथल भएको हो ।

ट्रम्पले ८१ वर्षीय बाइडेनको स्वास्थ्यलाई आफ्नो राजनीतिक रणनीति बनाउदै उहाँलाई कमजोर वृद्धको रूपमा चित्रण गर्नुभएको थियो । अब उहाँले आफुभन्दा लगभग दुई दशक कान्छी पहिलो अश्वेत, महिला र दक्षिण–एसियाली मुलको नितान्त फरक उम्मेदवारको सामना गर्नुहुनेछ ।

उम्मेद्वारको परिवर्तनले ट्रम्प र रिपब्लिकनहरूलाई आफ्नो रणनीति द्रूत रूपमा परिवर्तन गर्न बाध्य पारेको छ ।

अहिलेसम्म उहाँले आफ्नो नयाँ प्रतिद्वन्द्वीलाई ‘लाइङ कमला’, ‘लाफिङ कमला’ र ‘क्रेजी कमला’ का रूपमा वर्णन गर्नुभएको छ ।

गत हप्ता उत्तरी क्यारोलिनामा आयोजित समारोहमा गर्भपतनको विषयमा ह्यारिसको गलत व्याख्या गर्दै ट्रम्पले अमेरिकी उपराष्ट्रपतिलाई ‘बच्चाको मृत्युदण्ड’ को पक्षमा रहेको झूटो आरोप लगाउनुभएको थियो ।

चुनावी अभियानअन्तर्गत ट्रम्प बुधबार अश्वेत समुदायले सामना गर्ने समस्याको विषयमा अफ्रिकी–अमेरिकी पत्रकारहरूसँग छलफल गर्न शिकागो जानुहुनेछ । त्यसको भोलिपल्ट उहाँले पेन्सिलभेनियामा एउटा अभियान र्‍याली आयोजना गर्नुहुनेछ । चुनावी कार्यक्रमको नै शिलशिलामा ट्रम्प शनिबार एटलान्टा र जर्जिया पुग्नुहुनेछ ।

हालैका दिनमा चुनावी अभियानका लागि विस्कन्सिन, जर्जिया र इन्डियाना पुग्नुभएको ह्यारिसले बुधबार साँझ टेक्सासको ह्युस्टनमा अफ्रिकी–अमेरिकी विद्यार्थीहरूको भेलालाई सम्बोधन गर्नहुनेछ ।