कासिन न्यूज, काठमाडौं ।
राँझा (बाँके) – भारतीय सीमासँग जोडिएको बाँकेमा लागु-औषध दुर्व्यसन चुनौतीपूर्ण बन्दै गएको छ । लागु-औषध प्रयोगकर्ता र कारोबार गर्नेको सङ्ख्या बढ्दै जाँदा न्यूनीकरण कार्य चुनौतीपूर्ण बन्दै गएको हो ।

जिल्लामा हाल करिब १० हजार लागु-औषध प्रयोगकर्ता रहेको लागु-औषध उपचार तथा पुनःस्थापना केन्द्र महासङ्घका संयोजक रमेशकाजी महर्जनले बताउनुभयो ।

“लागु-औषध न्यूनीकरणका लागि विभिन्न प्रयास गरिए पनि प्रयोगकर्ताको सङ्ख्या बढ्दो क्रममा रहेको छ”, उहाँले भन्नुभयो, “दश जोड दुईमा अध्ययन गर्ने विद्यार्थीदेखि बेरोजगार युवाले दुव्र्यसनमा लागेर जीवन बर्बाद गरिरहेका छन् ।” जिल्लामा रहेका १० हजार प्रयोगकर्तामध्ये १ हजार ५ सय महिला रहेको उहाँको अनुमान छ ।

यहाँ लागु-औषध न्यूनीकरणका लागि २० वटा पुनःस्थापना केन्द्र रहेका छन् भने तीमध्ये दुई महिला पुनःस्थापना केन्द्र छन् । “बीस पुनःस्थापना केन्द्रमार्फत ४ सय लागुऔषध प्रयोगकर्तालाई स्वास्थ्य तथा व्यवहार परिवर्तनका लागि सेवा प्रवाह गरिएका छौँ । दुई महिला पुनःस्थापना केन्द्रमा ५० महिलालाई राखेर सुधारको प्रयास भइरहेको छ”, संयोजक महर्जनले भन्नुभयो ।

पछिल्लोपटक लागुऔपदार्थ प्रयोगको स्वरुपसमेत परिवर्तन भएकाले अवस्था थप चुनौतीपूर्ण बन्दै गएको लागु-औषधविरुद्धका अभियन्ता अभिराज क्षेत्रीले बताउनुभयो । विगतमा धुँवाका रूपमा प्रयोग हुने ब्राउनसुगर अहिले तरल बनाएर सुईको माध्यमबाट प्रयोग हुने गरेको पाइएको उहाँले जानकारी दिनुभयो । नेपालगञ्ज हुँदै लागु-पदार्थ अफिम र चरेस भारततर्फ जाने र भारतबाट ब्राउन सुगरलगायत मनोदिपक पदार्थ (नार्कोटिक ड्रग) नेपाल भित्रने गरेको जानकारी दिनुहुँदै क्षेत्रीले समस्या समाधानका लागि राजनीतिक दल र राज्यले थप प्रभाकारी कार्यक्रम अगाडि सार्नुपर्ने आवश्यकता औँल्याउनुभयो ।

लागुऔषध कारोबार बढ्दै जाँदा यहाँका युवापुस्ता दुव्र्यसनको उच्च जोखिममा छन् । पछिल्लो समय जिल्लाका ग्रामीण क्षेत्रमा पनि लागु-औषध कारोबार हुने गरेको छ । जिल्ला प्रहरी कार्यालय बाँकेका प्रवक्ता प्रहरी नायब उपरीक्षक नारायण डाँगीले लागुऔषध नियन्त्रणका लागि विभिन्न अभियान सञ्चालन भइरहेको बताउनुभयो । उहाँले सबै मिलेर समस्या समाधानमा लाग्नुपर्नेमा जोड दिनुभयो । डाँगीकानुसार गत आर्थिक वर्ष २०८०/८१ मा जिल्ला प्रहरी कार्यालयमा लागु-औषधका १ सय ७७ मुद्दा दर्ता भएका थिए । लागु-औषधमा संलग्न २ सय ६४ लाई पक्राउ गरी ९ सय २५ ग्राम बढी ब्राउनसुगर नियन्त्रणमा लिइएको थियो । त्यसअघि आव २०७९/८० मा १ सय ५७ मुद्दा दर्ता भएकामा २ सय ३६ जना पक्राउ पर्नुका साथै ८ सय ८२ ग्राम ब्राउनसुगर र ६ किलो गाँजा बरामद गरिएको थियो ।

जिल्लामा आव २०७८/७९ मा १ सय ३४ लागु-औषधसम्बन्धी मुद्दा प्रहरीमा दर्ता भएकामा २ सय १२ जना पक्राउ परेका जिल्ला प्रहरी कार्यालयको तथ्याङ्कले देखाएको छ । “लागु-औषध नियन्त्रणका लागि सीमापारि भारतीय सुरक्षा निकायसँग समन्वय गर्नेदेखि गाउँ–गाउँमा चेतनामूलक कार्यक्रमलाई अघि बढाएका छौँ”, प्रहरी नायब उपरीक्षक डाँगीले भन्नुभयो, “पछिल्लो समय ग्रामीण क्षेत्रका युवापुस्ता पनि लागु-औषधको उच्च जोखिममा छन् । यस्ता क्रियाकलाप रोक्न स्थानीय सरकार, सरोकारवाला र अभिवाकहरू सचेत बन्नुपर्ने आवश्यकता छ ।”