कासिन न्यूज, काठमाडौं ।
पछिल्लो दुई कारोबार दिन उच्च अङ्कले बढेको नेपाल स्टक एक्सचेञ्ज (नेप्से) परिसूचकको उकालो यात्रा आज रोकिएको छ । नेप्से परिसूचक २६ दशमलव शून्य सात अङ्कले घटेर २ हजार ५ सय ९७ दशमलव ४९ को बिन्दुमा कायम भएको हो ।

आज ३ सय १० कम्पनीको १ करोड ५१ लाख ९९ हजार ७ सय ६३ कित्ता शेयर ८३ हजार ८१ पटक खरिदबिक्री हुँदा रु. ६ अर्ब ७७ करोड ८१ लाख ९५ हजार ८ सय ८१ बराबरको कारोबार भएको छ ।

आज वित्त समूहको उपसूचक १ दशमलव ७५ प्रतिशतले बढेको छ भने अरु सबै समूहको उपसूचक घटेको छ । सबैभन्दा बढी निर्जीवन बिमा समूहमा १ दशमलव ८२ प्रतिशतको गिरावट देखिएको छ । बैंकिङ शून्य दशमलव ७१, विकास बैंक १ दशमलव ३८, होटल तथा पर्यटन १ दशमलव ७९, जलविद्युत् १ दशमलव ७४, लगानी १ दशमलव ५२ र जीवन बिमा शून्य दशमलव ४० प्रतिशतले घटेको छ ।

त्यस्तै, उत्पादन तथा प्रशोधन १ दशमलव ७९, लघुवित्त १ दशमलव १२, म्युचुअल फण्ड शून्य दशमलव ४१, व्यापार १ दशमलव १८ र अन्य समूह शून्य दशमलव शून्य ३ प्रतिशतले घटेको छ । थ्रीस्टार हाईड्रोपावर लिमिटेडको शेयर मूल्यमा आज सकारात्मक सर्किट लागेको छ भने विन नेपाल लघुवित्त वित्तीय संस्था लिमिटेडको शेयर मूल्यमा नकारात्मक सर्किट लागेको छ ।

कारोबार रकमका आधारमा आज सबैभन्दा बढी नेपाल फाइनान्स लिमिटेडको रु. २० करोड ७१ लाख ५५ हजार २ सय ६७ को शेयर किनबेच भएको छ । कारोबार भएका शेयर सङ्ख्याका आधारमा सबैभन्दा बढी हाइड्रो.इलेक्ट्रिसिटी इन्भेस्टमेन्ट एण्ड डेभलपमेन्ट कम्पनी लिमिटेड प्रमोटर शेयर ७ लाख ९ हजार ८ सय ६७ कित्ता किनबेच भएको छ ।