कासिन न्यूज,
२३ माघ, काठमाडौँ ।
पाकिस्तानी विकेटकिपर ब्याटर मोहम्मद रिजवानले नेपाल आएर सन्दीप लामिछानेसहितका राष्ट्रिय क्रिकेटरहरुसँग भेटेका छन् । रिजवानले नेपाली लेग स्पिनर सन्दीप लामिछानेलाई भेट्ने मनसाय आफूसँग राखेको नेपाल क्रिकेट संघ क्यानका अध्यक्ष चतुरबहादुर चन्दले बताए । ‘सन्दीप बाहिर जान नपाउने भएकाले उनलाई भेट्न आएको रिजवानले बताएका थिए’, चन्दले भने ।
आइतबार बेलुकी नेपाल आइपुगेका उनले आज सोमबार बिहान राष्ट्रिय क्रिकेट टिमका खेलाडीलाई भेटेका हुन् । ‘हामीले बिहान रिजवानसँग भेट गरेका छौं,’ एक खेलाडीले भने ।
आइतबार नै बेलुकी रिजवानले नेपाल क्रिकेट संघ क्यानका अध्यक्ष चन्दलाई भेट्दै नेपाली क्रिकेटका बारेमा छलफल गरेका थिए ।आफूहरुबीच निकै छोटो अनौपचारिक भेट भएको अध्यक्ष चन्दले बताए ।
बलात्कार आरोप लागेका सन्दीप विदेश जान नपाउने शर्तसहित अदालतको आदेशमा धरौटीमा छुटेका छन् र उनलाई क्यानले राष्ट्रिय टिममा समावेश गरेका छ । जसको सर्वत्र आलोचना भइरहेको छ ।
निक्कै छोटो समयका लागि नेपाल आएका रिजवान आजै १२ बजे फर्किएका छन् ।