कासिन न्यूज,
काठमाडौं ।
नियमित सामाजिक सामाजिक सञ्जाल फेसबुक र टिकटकमा जोडिरहने बानी परेका रौतहटका हरिप्रसाद यादव दुई वर्ष अघि मात्र रोजगारीको मलेसिया पुगेका थिए ।
विदेशमा रहँदा मन भुल्ने साथी टिकटकलाई बनाएका उनले बिस्तारै आफ्नो फोटो जोडेर भिडियो बनाउन थाले । टिकटकमा आफ्नो मात्र फोटो जोडेनन् । बिस्तारै अन्य मानिसका पनि फोटो जोड्न थाले । उनले आफ्नो सहोदर बहिनीको फोटो हालेर नियमित टिकटक चलाउन थाले । फोटो हाल्दा चरित्रहत्या गरी फोटो नियमित हाल्न थाले ।

हरिप्रसादले अश्लिल शब्द प्रयोग गर्दै बहिनी र आफन्तलाई पीडा दिन थाले । बहिनीका आफन्तलाई समेत मानसिक तनाव दिन उनी लागिरहे । पीडितले पनि कानुनी उपचारको बाटो खोज्ने उपाय खोजे ।
केही समयअघि बहिनीका आफन्तसहित पीडितहरू भोटाहिटीस्थित नेपाल प्रहरीको साइबर ब्यूरोमा पुगे । प्रहरीले उक्त टिकटक र प्रयोगकर्ताको खोजीमा लागिरह्यो । अनुसन्धानकै क्रममा टिकटक विदेशबाट चलाएको ब्यूरोले पत्ता लगायो ।
वैदेशिक रोजगारीमा मलेसिया पुगेका हरिप्रसाद केही समय अघि मात्र फर्कने पीडितका परिवारले प्रहरीलाई जानकारी गराए । नियमित सम्पर्क र उनको खोजीमा ब्यूरो लागिरह्यो ।
रौतहट देवाही नगरपालिका ८ हरिप्रसाद बुधबार स्वदेश फर्के । तर, उनलाई प्रहरीले त्रिभुवन अन्तर्राष्ट्रिविमानस्थलबाट नियन्त्रणमा लियो ।
फागुन ४ गते काठमाडौँ जिल्ला अदालतबाट पक्राउ पुर्जी लिएको ब्यूरोले जनाएको छ । उनलाई अनुसन्धान गर्न थप ५ दिनको म्याद लिएको ब्यूरोको भनाइ छ ।