कासिन न्यूज,
काठमाडौं ।
त्रिभुवन अन्तर्राष्ट्रिय विमानस्थलका तत्कालीन महाप्रवन्धक प्रेमनाथ ठाकुर घुस मागेको अभियोगमा निलम्बनमा परेपछि खाली भएको महाप्रवन्धक पदमा प्रतापबाबु तिवारी आएका छन् ।
नेपाल नागरिक उड्डयन प्राधिकरणले विभागीय प्रमुखहरुको जिम्मेवारी हेरफेर गर्ने क्रममा त्रिभुवन विमानस्थलको प्रमुखको जिम्मेवारी तिवारीलाई दिइएको हो । पहिले पनि विमानस्थलमा प्रमुखको जिम्मेवारी सम्हालिसकेका उनी हाल नागरिक उड्डयन प्रशिक्षण प्रतिष्ठानको प्रमुख थिए । अहिले तिवारीको स्थानमा देव चन्द्रलाल कर्णलाई पठाइएको छ ।
भैरहवाका गौतम बुद्ध अन्तर्राष्ट्रिय विमानस्थल महाप्रबन्धक गोविन्द दाहाल यसैसाता सेवा निवृत्त हुने भएकोले उनको स्थानमा एभिएसन सर्भिसेज निर्देशनालयको प्रमुखको जिम्मेवारीमा रहेका हंश राज पाण्डेलाई प्रमुख बनाएर पठाइएको छ ।