कासिन न्यूज,
काठमाडौं ।
काठमाडौँबाट भैरहवाका लागि उडेको श्री एयरलाइन्सको विमानको एउटा इन्जिनमा समस्या आएपछि काठमाडौं फर्काइएको छ । विमान त्रिभुवन विमानस्थलमा सुरक्षित अवतरण गराइएको विमानस्थलका प्रवक्ता टेकनाथ सिटौलाले जानकारी दिए । उनका अनुसार इन्जिन अफ गराएर विमानलाई काठमाडौंमा अवतरण गराइएको हो ।
त्रिभुवन विमानस्थलबाट उडेको करिब २० मिनेटमा विमान फेरि काठमाडौं फर्काइएको उनले बताए । सिटौलाका अनुसार श्री एयरलाइन्सको उडान नं ८२१ को जहाजको इन्जिनमा ‘फायर वार्निङ’ देखिएपछि जहाज बिचबाटै काठमाडौँतर्फ फर्काइएको हो ।
काठमाडौँबाट उड्नासाथ चालक दलका सदस्यले इन्जिनमा आगो देखिएको भनेर टावरलाई जानकारी गराएपछि धादिङमाथिको आकाशबाट जहाज फर्काएर त्रिभुवन अन्तर्राष्ट्रिय विमानस्थलमै आकस्मिक अवतरण गरिएको हो । जहाजमा रहेका चालक दलका सदस्य र यात्रुहरू सबै सकुशल रहेको उनको भनाइ छ । विमानमा ७८ जना यात्रु सवार थिए ।