कासिन न्यूज,
काठमाडौं ।
घरेलु मैदान ओल्ड ट्राफोर्डमा बिहीबार राति भएको खेलमा युनाइटेडले स्पेनिस क्लब रियल बेटिसमाथि ४–१ को फराकिलो जित निकालेको हो । युनाइटेडको जितमा मार्कस रासफर्ड, एन्टोनी, ब्रुनो फर्नान्डेस र वोउट वेगह्रस्टले गोल गरे । रियल बेटिसका एयोजी पेरेजले एक गोल फर्काए ।
खेलको छैटौं मिनेटमा रासफर्डको गोलबाट युनाइटेडले १–० को अग्रता लिएको थियो । ३२औं मिनेटमा एयोजीले गोल गर्दै खेललाई पहिलो हाफका १–१ गोलको बराबरीमा ल्याए ।

दोस्रो हाफ भने युनाइटेडको नाममा रह्यो । ५२औं मिनेटमा एन्टोनीले ब्रुनोको पासमा गोल गर्दै युनाइटेडलाई २–१ ले अघि बढाए । ५८औं मिनेटमा ब्रुनोले लुका साको पासमा गोल गर्दै टोलीलाई ३–१ को अग्रतासहित सहज जिततर्फ अगाडि बढाए ।
त्यसपछि ८२औं मिनेटमा वोउट वेगह्रस्टले स्कट म्याकटोमिनेको पासमा गोल गर्दै युनाइटेडको सानदार जित पक्का गराए ।यस जितले युनाइटेडको क्वाटरफाइनल पुग्ने सम्भावना बलियो बनेको छ ।

दोस्रो लेगमा यही नतिजा कायम राख्न सके युनाइटेड क्वाटरफाइनलमा पुग्नेछ । रियल बेटिसलाई भने फराकिलो जित बाहेकको विकल्प छैन । दोस्रो लेग १६ मार्चमा रियल बेटिसको मैदानमा हुँदैछ ।