कासिन न्यूज,
काठमाडौं ।
युनाइटेड अरव इमिरेट्स (युएई) आइसिसी विश्वकप लिग–२ त्रिकोणात्मक ओडिआई सिरिजमा पपुवा न्युगिनीसँग ५६ रनले पराजित भएको छ। युएईको लिग २ मा पिएनजीसँग लगातार चौथो हार हो ।
युएईको शीर्ष तीनमा रहँदै सोझै विश्वकप छनोट खेल्ने सम्भावना समाप्त हुँदा सोझै ओडिआई मान्यता प्राप्त पनि जोखिममा परेको छ । अव युएईले सोझै ओडिआई मान्यता प्राप्त गर्न बाँकी तीन खेलनै जित्नुपर्ने हुन्छ । जितको लागि २ सय ४७ रनको विजयी लक्ष्य पछ्याएको युएई ४२.२ ओभरमा १ सय ९० रनमा अल आउट भयो ।
युएईका २१ वर्षीय बायाँ हाते ब्याटर आर्यन लाक्राले ७२ बलमा ५ चौका र १ छक्कासहित सर्वाधिक ५१ रन बनाएपनि टोलीको हार टार्न सकेनन् । युएईलाई ओपनर तथा कप्तान मोहम्मद वासिमले २७ बलमा ४ चौका र ३ छक्कासहित ४१ रन जोड्दै आक्रामक सुरुवात दिलाएका थिए । वासिम तीव्र गतिका बलर काबुआ मोरेआको सातौं ओभरको पहिलो बलमा एक्स्ट्रा कभरमा राइली हेकुरेबाट क्याच आउट भएका थिए ।
हेकुरेले अर्का ओपनर आसिफ खानलाई ११ रनमा कट एण्ड बोल्ड आउट गरे । असद भालाले वृत्य अरविन्दलाई शून्यमा चाल्स अमिनीबाट क्याच गराएपछि युएई ७१–३ को अवस्थामा पुगेको थियो । चौथो विकेटका लागि सिपी र आर्यन लाक्राले ५० रनको साझेदारी गरेका थिए ।
सिपी रिजवान ४६ बलमा २ चौकासहित १९ रनमा रन आउट भए । आर्यनसँग तालमेल नमिल्दा रन आउटको शिकार हुन पुगेका थिए । असद भालाको ३१ औं ओभरको अन्तिम बलमा रोहन मुस्तफा ११ रनमा एलबीडब्लू आउट भए । त्यसअघिको ओभरमा हिरि हिरिले १० रनमा मुस्तफालाई जीवनदान दिएपनि सदुपयोग गर्न सकेनन् ।
मुस्तफा आउट भएको लगत्तै अर्को बलमा लाक्रा भानुवाको बलमा भालाबाट क्याच आउट भएपछि युएई समस्यामा परेको थियो । पिएनजीका राइली हेकुरेले सर्वाधिक तीन विकेट लिए । असद भाला र कबुआ मोरेआले दुई दुई विकेट लिए ।
त्यसअघि टियु क्रिकेट मैदानमा टस हारेर पहिला ब्याटिङको निम्तो पाएको पिएनजीले निर्धारित ५० ओभरमा ९ विकेट गुमाउँदै २ सय ४६ रन बनाएको थियो । पिएनजीका सेसे बाउ १ सय ६ बलमा १० चौकासहित सर्वाधिक ८१ रनमा अविजित रहे ।
ओपनर हिरि हिरि ८५ बलमा ५ चौका र ४ छक्कासहित ७७ रनमा बोल्ड आउट भए । करिअरको उत्कृष्ट प्रदर्शन गरेका हिरि आयन खानको बलमा बोल्ड आउट हुन पुगे ।
यसअघि तल्लोक्रममा खेल्ने हिरिलाई पिएनजीले टोनी उराको स्थानमा ओपनिङ गराएको थियो । उराको अभ्यासकोक्रममा खुट्टामा चोट लागेपछि हिरिले ओपनिङ गरेका थिए ।
हिरि आउट हुनुअघि पिएनजी ३१.२ ओभरमा १८४–१ को बलियो अवस्थामा थियो । ३१ औं ओभरको तेस्रो बलमा हिरि र चौथो बलमा असद भालालाई बोल्ड गर्दै आयन खानले युएईलाई खेलमा फर्काएका थिए ।
अन्तिम १ सय १२ बलमा पपुवा न्युगिनीले ८ विकेट गुमाउँदै ६२ रन मात्रै जोडेपछि विशाल योगफलबाट चुकेको हो । दोस्रो विकेटका लागि हिरि र सेसे बाउले १ सय १२ रनको कीर्तिमानी शतकीय साझेदारी गरेका थिए । उक्त साझेदारी पिएनजीको ओडिआईमा कुनैपनि विकेटका लागि भएको उच्च साझेदारी थियो ।
यसअघि ओडिआईमा पिएनजीको उच्च साझेदारी नेपालविरुद्ध गत वर्ष चौथो विकेटका लागि लेगा सियाका र सेसे बाउले १ सय १० रनको गरेका थिए ।
पिएनजीलाई ओपनर किप्लिङ डोरिगा र हिरिले १०.१ ओभरमा ७२ रनको साझेदारी गर्दै राम्रो सुरुवात दिलाएका थिए । डोरिगा आयन खानको बलमा ५५ रनमा एलबीडब्लू आउट हुँदै पेभेलिएन फर्केका थिए । डोरिगाले ४४ बलमा ८ चौका र २ छक्का प्रहार गरे ।
चाल्स अमिनी ४, राइली हेकुरे १ र चाद सोपर १० रनमा आउट भए । नर्मन भानुवा १० रनमा आउट भए । युएईका आयन खानले १० ओभरमा १ मेडनसहित ३४ रन खर्चेर ३ विकेट लिए ।
रोहन मुस्तफाले १० ओभरमा १ मेडनसहित २४ रन खर्चेर १ विकेट लिए । जुनैद सिद्दिकले १० ओभरमा १ मेडनसहित ३९ रन खर्चेर २ विकेट लिए । जहुर खानले दुई र कार्तिक मयाप्पनले एक विकेट लिए । युएईले आइतबार र पपुवा न्युगिनीले सोमबार नेपालविरुद्ध खेल्नेछन् ।

अंक तालिका
स्कटल्यान्ड ३६ खेलमा २४ मा जित र १० मा हारका साथ ५० अंकका साथ शीर्ष स्थानमा रहँदै अन्त्य गर्यो । ओमान ३६ खेलमा २१ मा जित र १३ मा हारसहित ४४ अंकका साथ दोस्रो अन्त्य गरेको छ । नामिबिया ३६ खेलमा १९ मा जित र १६ मा हारका साथ ३९ अंकका साथ तेस्रो स्थानमा छ ।

अमेरिका ३६ खेलमा १६ मा जित र १७ मा हारसहित ३५ अंकका साथ चौथो स्थानमा छ । नेपाल ३३ खेलमा १६ मा जित र १५ मा हारसहित ३४ अंकका साथ पाँचौं स्थानमा छ । युएई ३३ खेलमा १४ मा जित र १६ मा हारसहित ३१ अंकका साथ छैटौं स्थानमा छ । पपुवा न्युगिनी ३४ खेलमा ५ मा जित र २८ मा हारसहित ११ अंक जोड्दै पुछारमा छ।