कासिन न्यूज,
काठमाडौं ।
इंग्लिस फरवार्ड ह्यारी केन र दक्षिण कोरियाली फरवार्ड ह्युङ मिन सनले गोल गरेपछि टोटेनहम हटस्परले इंग्लिस प्रिमियर लिगमा सहज जित दर्ता गरेको छ ।
टोटेनहमले घरेलु मैदानमा नटिङहम फरेस्टमाथि ३–१ को सहज जित दर्ता गरेको हो । ह्यारी केनले २ तथा सनले १ गोल गरे ।टोटेनहम हटस्पर स्टेडियम लन्डनमा शनिबार राति भएको खेलको तेस्रो मिनेटमा नै रिचार्लीसनले गोल गरेपछि भिएआरबाट मान्यता पाएन ।
तर, १९औं मिनेटमा केनले गोल गर्दै टोटेनहमलाई १–० को अग्रता दिलाए । उनले पेड्रो पोरोको पासमा गोल गर्न सफल भएका थिए । ३५औं मिनेटमा केनले पेनाल्टीमार्फत व्यक्तिगत र टोलीका लागि दोस्रो गोल गर्दै अग्रता दोब्बर पारे । पेनाल्टी बक्समा कप्तान जोई ओरलले रिचार्लीसनलाई फउज गरेपछि प्राप्त पेनाल्टीमा केन चुकेनन् ।

६२औं मिनेटमा ह्युङ मिन सनले गोल गर्दै टोटेनहमलाई ३–० ले अघि बढाए । उनले रिचार्लीसनको पासलाई सदुपयोग गरेका थिए । ८१औं मिनेटमा जोई ओरलले गोल गरेपनि त्यसपछि थप गोल निस्कन नसक्दा टोटेनहम ३–१ ले विजयी हुन सफल भयो ।
यस जितसँगै टोटेनहम २७ खेलबाट ४८ अंक जोडेर चौथो स्थानमा यथावत रहेको छ । पराजित नटिङहम २६ खेलबाट २६ अंक जोडेर १४औं स्थानमा छ ।