कासिन न्यूज,
काठमाडौं ।
नेपाली राष्ट्रिय टोलीका रोहित चन्द सम्मलित टोली प्रेसिक केडिराले इन्डोनेसियाको लिगा १ मा आइतबार विजय हासिल गरेको छ । प्रेसिकले घरेलु मैदानमा अंक तालिकाको तेस्रो स्थानमा रहेको रोहितको पूर्व क्लब पर्सिजा जाकार्तालाई २–० ले हराएको थियो ।
यसै सिजन प्रेसिकमा आबद्ध भएका रोहितले पूर्व क्लबविरुद्ध पूरा समय मैदानमा बिताएका थिए । टोलीलाई जित दिलाउन अल हर्मा हेहानुसा र मोहम्मद खानाफीले गोल गरेका थिए । हेहानुसाले १० औं र खानाफीले ७५ औं मिनेटमा गोल गरेका थिए । जितपछि प्रेसिक ३२ अंकका साथ १५ औं स्थानमा छ । १८ टोलीको सहभागिता रहेको लिगा १ मा प्रेसातुन ६० अंकका साथ शीर्षस्थानमा रहेको छ । पर्सिजाको ५१ र दोस्रो स्थानको पर्सिबको ५२ अंक छ ।
सिजनको सुरुवातमा लगातार खराब प्रदर्शनबाट गुज्रिएको प्रेसिकले पछिल्लो समयमा भने लगातार जित निकाल्दै आएको छ । टोलीले लगातार पाँचौं जित निकाल्दै अंक तालिकामा सुधार गरेको छ । सिजनमा २९ खेल खेल्ने क्रममा प्रेसिकले ८ जित ८ बराबरीब १३ खेलम हार बेहोरेको थियो ।