कासिन न्यूज,
काठमाडौं ।
म्यान्मारको सेनाले दक्षिणी श्यान राज्यको एउटा बौद्ध मन्दिरमा रहेका २८ जना भन्दा बढिको हत्या गरेको म्यान्मारको विद्रोही समूहले जनाएको छ । सेनाले शनिवार नान नेङ गाउँमा गोलाबारी गरेको करेन्नी न्याशनालिटिज् डिफेन्स फोर्स (केएनडीएफ) ले बताएको छ।
म्यान्मारमा दुई वर्षअघि सेनाले कूद्वारा सत्ता कब्जा गरेपछि सेना र सशस्त्र विरोधी समूहहरूबीच हमलाहरु हुँदै गएको छ। राजधानी नेपिडो र थाइल्यान्डको सिमाना बीचमा रहेको उक्त क्षेत्रमा सबैभन्दा भीषण लडाइँ भएको छ।
शनिवार म्यान्मारको समयअनुसार अपरान्ह ४ बजे गोलाबारी गर्दै उक्त गाउँमा प्रवेश गरेका वायुसेना र सैनिकहरूले एउटा बौद्ध मन्दिरभित्र लुकेका गाउँलेको हत्या गरेको केएनडीएफले बताएको छ।
केएनडीएफका तर्फबाट जारी गरिएको एउटा भिडिओमा कम्तीमा २१ वटा शवहरू देखाइएको छ। त्यसमध्ये तीनवटा शवहरू बौद्ध भिक्षुले लगाउने सुन्तला रङका चिबर पोसाकमा रहेका र बौद्ध मन्दिर अगाडि थुप्रिएको अवस्थामा देखिएका छन्।

सैन्य सरकारविरुद्ध लडाइँमा सामेल भएका धेरैवटा जातीय विद्रोही सेनामध्ये केएनडीएफ पनि एउटा हो। बौद्ध मन्दिरको भित्तामा पनि गोली लागेका प्वालहरू देखीएका छन् ।